Aqtóbede temirjol vokzalynyń bir bóligi jekeniń qolynda qaldy
AQTÓBE. KAZINFORM – Shalqar aýdanyndaǵy vokzaldyń bir bóligi 30 jyl buryn jekeniń qolyna ótip ketken. Jańǵyrtý jumystary kezinde kásipker qasbeti men shatyryn qosa jańalaıdy.
Aqtóbe oblysynda 7 temirjol vokzaly jańartylyp jatyr. Olar Aqtóbe qalasynan ózge Qandyaǵash, Shalqar, Alǵa, Jem, Qaraýylkeldi jáne Shubarqudyq stantsııalary.
- Qazirgi tańda qurylysshylar vokzal ǵımarattarynyń qasbeti men ishki bólmelerin jańǵyrtý, ınjenerlik-kommýnıkatsııalyq júıelerdi aýystyrý, kútý zaldaryn abattandyrý, sanıtarlyq toraptardy jańartý jáne irgeles aýmaqtardy kórkeıtý jumystaryna kiristi. Barlyq jumystyń belgilengen merzimde ári sapa talaptaryna tolyq sáıkes oryndalýy – turaqty baqylaýda. Merdiger uıymdarǵa qurylys-montaj jumystarynyń sapasyn qamtamasyz etý, ınjenerlik jelilerdi tolyq jańartý jáne qaýipsizdik talaptaryn qatań saqtaý mindetteldi,- dep habarlady Aqtóbe oblysy ákiminiń baspasóz qyzmeti.
Osynyń ishinde Shalqar stantsııasyndaǵy temirjol vokzalynyń bir bóligi jekeniń qolyna ótip ketken. Kásipker ǵımarattyń bir búıirin 1997 jyly zańdy túrde jekeshelendirip alǵanyn aıtqanymen, qansha qarjy jumsaǵanyn jarııalamady.
- Ol 30 jyl buryn boldy. Jekeshelendirý kezinde berdi, sol ýaqytta aldym. Sodan keıin ony keri qaıtarý týraly áńgime aıtylmady. Alsa qazir de berýge daıynmyn. Qansha teńgege alǵanymdy aıta almaımyn. Ol ýaqyt pen búgingi jaǵdaı birdeı emes. Sol shaqta da az aqsha bermedim. Ǵımaratta dámhana, jazǵy dámhana, saýda orny bar. Ózim Aqtóbe qalasyna qonys aýdardym ári úlkeıdim. Aýylda kásipti jalǵastyratyn balam, týysqanym joq bolyp, jalǵa berip qoıdym,- dedi Bıbigúl Boranqulova.
Onyń aıtýynsha, jergilikti ákimdikpen kelisip, qasbetin árleý, shatyryn jańartý jumystaryn júrgizbek, ıaǵnı jańǵyrtý jumystary aıaqtalǵanda vokzaldy syrtqy qasbetinde ózgeshelik bolmaıdy. Al qazir bir bóliginde jóndeý júrip jatsa, ekinshi kóbigi kók túske boıaýly kúıi qalǵan.
Aıta keteıik, Atyraýda temirjol vokzaly aýmaǵynda jumys istep kelgen kásipkerler saýda oryndaryn bosatý týraly habarlama alǵannan keıin alańdaýshylyq bildirip otyr. Olardyń aıtýynsha, nysandardy kóshirýge nebári on kún ýaqyt berilgen.
