Aqtóbede temirjol vokzalyndaǵy avtoturaq jeke menshikke zańsyz berilgen bolyp shyqty
Aqtóbe qalasy Almaty aýdandyq prokýratýrasy «Temirjol vozkaly mańyndaǵy avtoturaqqa elektrondy talondy engizý» jobasynyń oryndalýyn tekserdi. Sebebi 2018 jyldyń qyrkúıek aıynda avtoturaq memlekettik – jekeshelik áriptestik aıasynda kásipkerdiń basqarýyna berilgen bolatyn. Kelisimshart boıynsha eki merzim bekitilgen. Birinshisinde 3 aı ishinde jańǵyrtý jumystaryn júrgizedi, ekinshisinde 5 jyl jeke seriktestiń basqarýynda bolady.
«Memleket tarapynan, jeke kásipker de óz mindetterin tolyq oryndamaǵan. Máselen, kelisimshart boıynsha quny 14 mıllıon teńge bolatyn kirgizý, ótkizý beketi salynýy kerek. Sodan keıin ol kommýnaldyq menshikke beriledi. Biraq jeke kásipker osy talapty oryndamady. Sonymen qatar memlekettik mekeme jer telimi qujattaryn durys rásimdemegen. Tekserý qorytyndysynan soń memlekettik – jeke menshik seriktestik kelisimshartyn buzý týraly uıǵarym berildi. Al Aqtóbe qalalyq turǵyn úı-kommýnaldyq sharýashylyq bóliminiń jaýapty qyzmetkerine tártiptik jaza qoldanyldy», - dedi Aqtóbe qalasy Almaty aýdandyq prokýrorynyń orynbasary Baqytjan Eshmaǵambetov.
Avtoturaqqa kirý jeńil kólik úshin 100 teńge, al júk kólikteri úshin 150 teńge bolyp tur. Prokýratýra kelisimshartty zańsyz dep tapqanymen vokzal mańyndaǵy avtoturaq áli aqyly qyzmet kórsetip jatyr. Al qalalyq ákimdik «Aqtóbe parkıng» mekemesi búgin óz qyzmetin toqtatady dep sendirdi.
«Aýmaq memlekettik mekemege beriledi. Ázirge ol avtoturaqtyń tegin nemese aqyly bolatyny belgisiz», - dedi qala ákiminiń baspasóz qyzmetiniń jetekshisi Qambar Muqashev.