Aqtóbede temirjol boıynda selfı jasaǵan stýdent qyz mert boldy
AQTÓBE. QazAqparat – Aqtóbede selfı jasap, temirjol boıynda sýretke túsken qyz aýrýhanada kóz jumdy, dep habarlaıdy QazAqparat tilshisi.
Oqıǵa 4 jeltoqsan kúni bolǵan. Saǵat saǵat 23:00 shamasynda Áýe qalashyǵy aýdanyndaǵy temirjol boıynsha eki qyz selfı jasap, sýretke túsken.
«Eki qyz kele jatqan poıyzdyń fonynda, selfı jasaǵan. Sol kezde qyzdardyń birin poıyz qaǵyp ketti. Zardap shegýshi Aqtóbe qalasynyń jedel járdem aýrýhanasyna jetkizildi, sol jerde búgin tańerteń kóz jumdy. Osyǵan baılanysty polıtsııa departamenti jaıaý júrginshilerdi temirjol mańynda, avtojoldarda saq bolýdy eskertedi», - dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, qarasha aıynda Aqtóbe oblysynyń joldarynda 43 jaıaý júrginshi zardap shekti, onyń altaýy qaza boldy. Jyl basynan beri jol-kólik apatynan 17 adam kóz jumǵan.
«Polıtsııa qyzmetkerleri jol qozǵalysy erejelerin qatań saqtaýdy eskertedi. Jaıaý júrginshiler tasjoldy kesip óter kezde kóliktiń baǵyty men jyldamdyǵyn qarap, toqtaǵan kezde ǵana qozǵalýy tıis. Búgingi kúni oblys polıtseıleri belgilenbegen jerden ótken 14 myńnan astam azamatty ákimshilik jaýapkershilikke tartty. Bul ótken jyldyń osy kezeńimen salystyrǵanda 2 myń adamǵa kóp», - dedi Erbolat Sarqulov.
