Aqtóbede televıdenıe, radıo jáne gazet mýzeıi ashyldy
AQTÓBE. QazAqparat - Aqtóbedegi «Qazaqstan-Aqtóbe» telearnasynyń ǵımaratynda arna qyzmetkerleriniń bastamasymen televıdenıe, radıo jáne gazet mýzeıi ashyldy, dep habarlaıdy «QazAqparat» HAA tilshisi.
Mýzeı Aqtóbe oblysyndaǵy buqaralyq aqparat quraldarynyń bárine ortaq. Mýzeı eksponattary retinde «Aqtóbe», «Aqtóbe habarshysy» oblystyq gazetteriniń qundy nusqalary, «Evrıka», «Kerek ınfo», «Aqtóbe Taıms» gazetteriniń alǵashqy nómirleri qoıyldy, «Dıapazon» gazetiniń qyzmetkerleri estelik kitap jáne alǵashqy fotoapparattardy ákelse, «Tandem» radıosy alǵashqy radıobasqarý pýltin usyndy. «RIKA TV» telearnasy óziniń leıbly men mereıtoılyq belgilerin qoıdy.
57 jyldyǵyn toılaǵan «Qazaqstan-Aqtóbe» telearnasy basqalarǵa qaraǵanda kóbirek eksponattar shyǵardy. Olardyń arasynda keńestik kezeńniń vıdeokameralary, dybys jazý, kınolenta qondyrǵylary bar. Mýzeıdegi erekshe eksponattardyń biri retinde 1960 jyly shyǵarylǵan «Kınor» vıdeokamerasyn aıtýǵa bolady. 30 jyldyq tarıhynda kamera 25 myńnan astam sıýjet túsirgen. Óz zamanynda ol aldyńǵy qatarly kameralardyń biri dep moıyndalatyn. Onyń obektıvi Lenıngradtaǵy ǵarysh teleskoptaryn qurastyrýmen aınalysatyn «Lomo» birlestiginde jasalǵan.
Bul aıtylǵandardan tys, mýzeıdiń óz kitaphanasy da bar, ol jergilikti jýrnalısterdiń kitaptarymen toltyryldy.
