Aqtóbede telefon urlaǵan balanyń ákesi ákimshilik jazaǵa tartyldy

AQTÓBE. KAZINFORM – Aqtóbede balasy úshin ákesi jaza arqalady. Jasóspirim telefon urlap, ákesi 5 táýlikke qamaldy.

Aqtóbe oblystyq PD baspasóz qyzmetiniń habarlaýynsha, Qobda aýdanynyń 14 jastaǵy turǵyny Aqtóbe qalasyna kelgen. Kámelet jasqa tolmaǵan bala adam kóp jınalatyn jerde beıtanys bireýdiń telefonyn alyp ketken. Polıtsııa ony anyqtap, urlanǵan baılanys quralyn tárkiledi.

- Qobda aýdandyq sotynda kámeletke tolmaǵan balanyń ata-anasyna qatysty ákimshilik is qaraldy. Balany tárbıeleý jáne oǵan bilim berý, onyń quqyqtaryn jáne múddelerin qorǵaý jónindegi mindetterdi oryndamaǵany úshin sot sheshimimen ákesi kináli dep tanyldy. Balasynyń tárbıesine beıjaı qaraǵan er adam 5 táýlikke ákimshilik qamaqqa alyndy, - dep habarlady Aqtóbe oblystyq PD baspasóz qyzmeti.

Aıta keteıik, byltyr elde balaǵa qatysty kez kelgen zorlyq-zombylyq túrleri úshin jaýapkershilik qatańdatylyp, zańǵa ózgeris engizildi. Jańa sanktsııa boıynsha kámeletke tolmaǵan balany qorlaý, ıaǵnı býllıng jasaǵany úshin 10 aılyq eseptik kórsetkish mólsherinde aıyppul qarastyrylǵan. Eger agressor kámeletke tolmasa, onda jaýapkershilik onyń ata-anasyna nemese zańdy ókilderine júkteledi.