Aqtóbede tekserý komıssııasymen birge demalys ortalyǵynda tynyqqan sheneýnikter jazalandy
AQTÓBE. KAZINFORM – Baıǵanın aýdandyq ekonomıka jáne qarjy bóliminiń basshysy Tólegen Moldabekov, onyń orynbasary Murat Erjanov qatań sógis aldy. Ekeýi de jumys ýaqytynda «Aqqum-Saǵyz» demalys ortalyǵyna baryp, sýǵa shomylyp, tynyqqan.
Ádep keńesinde Baıǵanın aýdandyq ekonomıka jáne qarjy bóliminiń basshysy Tólegen Moldabekovke, onyń orynbasary Murat Erjanovqa qatysty is qaraldy. Aqtóbe oblystyq memlekettik qyzmet isteri departamentiniń bas mamany Tańatar Nuǵmetovtiń aıtýynsha, bıyl shilde aıynda Moldabekov óziniń orynbasary Erjanovpen birge demalys ortalyǵyna bardy.
Olardyń janynda Altaı batyr aýylyndaǵy mádenıet úıiniń jumysyn tekserýge barǵan komıssııa músheleri de boldy.
- Ekeýiniń demalys ortalyǵyna barǵany jáne Saǵyz ózenine shomylǵany Baıǵanın aýdany turǵynynyń beınejazbasyna bar. Jergilikti atqarýshy organnyń jumys ýaqyty saǵat 09:00-dan 18:30-ǵa deıin. Túski úzidik 12:30-dan 14:00-ge deıin. QR Memlekettik qyzmetshilerdiń ádep kodeksine sáıkes memlekettik qyzmetshiler iskerlik qaǵıdalaryn saqtap, azamattardyń kóz aldynda ózderi ókil bolyp tabylatyn memlekettik organdardyń abyroı men bedeline nuqsan keltirmeýi tıis. Baıǵanın aýdany ekonomıka jáne qarjy bóliminiń basshysy T.Moldabekov, orynbasary M.Erjanov QR Memlekettik qyzmetshi jónindegi ádep kodeksiniń 6-tarmaǵy 5-tarmaqshasy, 8-tarmaǵy 2-tarmaqshasynda kózdelgen talaptardy buzǵan,- dedi Tańatar Nuǵmetov.
Ádep keńesinde aýdandaǵy memlekettik qyzmetshiler komıssııa múshelerine erip, aýylǵa barǵany anyqtaldy. Alaıda olarda qandaı da bir buıryq bolmady. Tek «tekserý komıssııasynyń múshesi ótinish jasady» dep aqtaldy.
- Komıssııa músheleriniń de jaýapkershiligin qaraý týraly usynys engizildi. Bul kisiler de, olar da jumys ýaqytyndaǵy áreketteri úshin jaýapty. Turǵyndar tarapynan syn aıtyldy. Syn jaıdan jaı emes, negizdi. Demalys orny aýyldan da, aýdan ortalyǵynan da qashyq. Oǵan arnaıy barmasań, jol ústinen soǵa salatyn jer emes. Aýdan bıýdjetiniń basy-qasynda júrgen azamattardyń máselesin sol jerdiń turǵyndary kóterip tur,- dedi Ádep keńesiniń tóraǵasy Aıbek Shilmanov.
Ádep keńesi eki memlekettik qyzmetshige de qatań sógis berýdi uıǵardy.
Eske salsaq, buǵan deıin Aqtóbede josyqsyz merdigerdi tizimge engizbegen memlekettik qyzmetshiler jazalanady.