Aqtóbede «Taza Qazaqstan» jalpy ulttyq aktsııasy aıasynda jańa skver ashyldy
AQTÓBE. KAZINFORM – Aqtóbede qala ákiminiń qalany abattandyrýǵa úles qosý týraly úndeýin qabyl alǵan kásipkerlerdiń demeýshiligimen saıabaqtar men skverlerdi, bos jatqan aýmaqtardy abattandyrý jumystary jalǵasýda.
Sondaı nysannyń biri — qalanyń tarıhı bóligi Turǵyndar qalashyǵy aýdanyndaǵy bos jatqan ýchaske. Kúz-kóktemge balshyqtan adam aıaǵy júrgisiz bolyp qaraýsyz jatqan bul jerdi abattandyryp, turǵyndar úshin demalatyn qoǵamdyq keńistikke aınaldyrýmen qalanyń janashyr turǵyny, kásipker Zulqoja Qojaev aınalysty. Qala ákimi ashylýyna qatysyp, kásipkerge turǵyndar atynan alǵysyn jetkizdi.
Bul saıabaq «Taza Qazaqstan» aktsııasy aıasynda ashyldy.
— Siz ótken jyly otbasyńyzdyń atynan M.Mámetova kóshesiniń boıynan bos ýchaskege jańa skver salyp berdińiz. Turǵyndar bul ıgi isińizge óte rıza. Mine, bıyl da qalamyzdy abattandyrýǵa úles qosyp jatyrsyz. Jılgorodok turǵyndary jańa skverdiń ashylýyn jaqsy qabyldaıdy, kútip ustaıdy dep senemin, — dedi Azamat Beket.
1,5 gektar aýmaqta park jıhazdaryn ornatyldy, jaryqtandyryp, trotýar tóseldi.
— Jer ústimen ótip jatqan jylý trassasynyń qubyrlaryn jerdiń astyna ornalastyrdyq. Odan bólek, 78 dana park shamdaryn ornattyq, 1800 sharshy metrge brýschatka tósedik. Kógaldandyrdyq, sýarý júıesin júrgizdik. Bıyl Azamat Baýyrjanulyna ózimiz osy jerdi abattandyryp bereıik dep usynys jasadyq. Bul aqtóbelikterge meniń otbasymnyń atynan jasap jatqan taǵy bir syılyǵym, turǵyndardan tek uqypty bolýdy, jasap bergendi syndyrmaýdy suraımyn, — dedi Zulqoja Qojaev.
