Aqtóbede táýligine 3,7% ósimmen qaryz bergen zańsyz bıznes toqtatyldy
ASTANA. KAZINFORM – Qarjylyq monıtorıng agenttiginiń Aqtóbe oblysy boıynsha departamenti lombard qyzmeti salasyndaǵy zańsyz kásipkerlik faktisi boıynsha tergeýdi aıaqtady.
Tergeý málimetinshe, kúdikti 2020-2025 jyldar aralyǵynda uıaly telefondar, teledıdarlar, oıyn prıstavkalary men fotoapparattardy kepilge alyp, halyqqa qaryz berýmen aınalysqan. Alaıda onyń bul qyzmetti júzege asyrýǵa qajetti lıtsenzııasy bolmaǵan. Zańsyz áreketin jasyrý úshin ol qyzmetin komıssıondyq dúken retinde kórsetken.
– Kúdikti qarjyǵa muqtaj azamattardyń jaǵdaıyn paıdalanyp, táýligine 3,7%-ǵa deıin jetetin joǵary paıyzdyq mólsherlemeler belgilegen. Bul zańmen belgilengen 0,3% shekten 12 ese joǵary. Qylmystyq jolmen alynǵan tabys kólemi 93 mln teńgeden asqan, – delingen QMA málimetinde.
Máselen, bir klıent 257 myń teńgeni 10 kúnge rásimdep, 51 400 teńge kóleminde syıaqy tóleýge májbúr bolǵan. Al zań boıynsha bul soma 7 710 teńgeden aspaýy tıis edi.
Sot sanktsııasymen kúdiktiniń úsh avtokóligi men páterine tyıym salyndy. Oǵan qatysty elden shyqpaý jáne tıisti minez-qulyq týraly qolhat túrindegi bultartpaý sharasy qoldanylǵan.
– Qylmystyq is sotqa joldandy. QR Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy, – dep atap ótti vedomstvo.
Qarjylyq monıtorıng agenttigi azamattarǵa kepilmen qaryz beretin uıymdardyń lıtsenzııasyn mindetti túrde tekserýdi usynady. Sebebi mundaı qyzmet túri memlekettik retteýge jatady jáne zańsyz uıymdarǵa júginý múlik pen qarajattan aıyrylý qaýpin arttyrady.
Aıta keteıik, Almatyda qarjy pıramıdasyn uıymdastyrýshylar eldi beınerolık kórý arqyly paıda tabasyń dep aldaǵan.
