Aqtóbede «Táýelsizdik urpaqtary» grantynyń jeńimpazdary aqshasyn ala almaı júr

AQTÓBE. KAZINFORM — Konkýrs jeńimpazdary 2025 jyldyń sońynda anyqtaldy. Alaıda grant qarjysy keler aıda ǵana aýdarylady. 

Aqtóbe oblysynda 2024 jyly «Táýelsizdik urpaqtary» konkýrsyna 30 grant qarastyryldy.

Árqaısysyna 3 mln teńge bólý josparlanǵan edi. Alaıda konkýrs talaptary kúrt ózgerip, jastar vıdeo tanystyrylymyn daıyndap úlgermedi. 2025 jyly bul grant taǵy da bólindi.

Aldyn ala habarlama bolyp, jastar óz jobasyn usyndy. Komıssııa qatysýshylardy iriktep, jeńimpazdar da anyqtaldy. Alaıda jeńimpazdar qarjyny áli almady.

— Uıymdastyrý konkýrsyn «Jasken» qoǵamdyq qory utyp aldy. Olar qujat qabyldap, komıssııa tikeleı efırde irikteý júrgizgenimen, jastarǵa qarjyny aýdarmady. Grant jeńimpazdaryna aqsha aýdarý úshin bıýdjetten qosymsha qarjy alamyz. Oblystyq máslıhat sessııasy ótken kezde 20 jastyń grantyna arnalǵan qarjyny bólýdi qarastyramyz. Olarǵa 26 mln teńge beriledi. Aqsha aqpan aıynda aýdarylady. Al qoǵamdyq qordy sotqa berdik, shyǵyndy óndirý jáne josyqsyz dep taný úshin talap aryz túsirdik, — dedi Aqtóbe oblystyq jastar saıasaty máseleleri basqarmasynyń basshysy Álibek Turalıev.

Onyń aıtýynsha, sot otyrysy osy aptada ótedi.

Aıta keteıik, «Táýelsizdik urpaqtary» oblystyq granttyq konkýrsynda 6 baǵyt qamtyldy. Onda 20 adamnyń árqaısysyna 1,3 mln teńge qarastyryldy. Komıssııaǵa tek joba berildi, adamdardyń aty-jóni jazylmady. Sonymen birge irikteý tikeleı efırde ótti. 

Aıta keteıik, «Táýelsizdik urpaqtary» granty oblystyq, sonymen birge respýblıkalyq deńgeıde ótedi. Respýblıkalyq baıqaýdyń otyz úzdik jobasynyń ıeleri elordaǵa jınaldy. Olardyń árqaısysyna 3 mln teńgeden berildi.