Aqtóbede Táýelsizdik kúnine oraı dárigerler baspanaly boldy
Sharanyń resmı bóligin oblys ákiminiń orynbasary Marat Toqjanov ashty. Jınalǵandardy oblys basshylyǵy atynan quttyqtaǵan ol medıtsına jurtshylyǵynyń óńirdiń damýyna qosqan úlesin atap ótti.
«Táýelsizdik jyldarynda Aqtóbe oblysynyń densaýlyq saqtaý salasy úlken jetistikke qol jetkizdi. Eki jyl buryn qurylǵan medıtsınalyq klasterdiń arqasynda búkil Batys Qazaqstan turǵyndaryna kúrdeli joǵary tehnologııalyq aralasýlar qol jetimdi boldy. Balalardyń júregine ashyq ota jasaý, organdardy aýystyrý, býyndardy endoprotezdeý bizdiń dárigerler úshin úırenshikti jumysqa aınaldy. Medıtsınalyq qyzmetter kórsetýde Ońtústik Koreıa, Izraıl, AQSh jáne Reseı sııaqty álemdik kóshbasshylarmen tyǵyz yntymaqtastyq ornatyldy. Barlyq ortalyqtar ozyq jabdyqpen jabdyqtalǵan. Oblys ákimi Berdibek Saparbaevtyń tapsyrmasymen aýyldaǵy jumystar jolǵa qoıyldy. Óńirde bir jyldyń ishinde MJS aıasynda 21 aýyldyq dárigerlik ambýlatorııa salyndy. Sizderdiń adam ómirine arasha bolýdaǵy kúndelikti eńbekterińiz úshin bas ıemin», - dedi M.Toqjanov.
Saltanatty shara marapattaý rásimine ulasty. Aqtóbelik dárigerlerge berilgen marapattardyń ishinde «Densaýlyq saqtaý isiniń úzdigi» jáne «Densaýlyq saqtaý isine qosqan úlesi úshin» tósbelgileri, sonymen qatar, «Eńbek ardageri» medali bar. Ol marapttarǵa shırek ǵasyrdan astam eńbek ótili bar 14 medıtsına qyzmetkeri ıe boldy.
Sodan keıin kópten kútken sát - páter kiltterin tabystaý sharasy boldy. Endokrınolog Móldir Tomarova, balalar hırýrgi Ashat Batyrov pen anestezıolog Nurmuhambet Bıgıev syndy jas mamandar baspanaly boldy.
«Dıplomymdy alǵan soń eńbek jolyn Aqtóbe medıtsınalyq ortalyǵynda terapevt bolyp bastadym. Sonymen qatar, rezıdentýrada biliktilik aldym. Endokrınologııalyq bólimde jumys istep jatqanyma eki jyl boldy. Bizderge munda naýqastardy emdeý úshin barlyq jaǵdaı jasalǵan. Páter alam dep oılamappyn. Týystarym men áriptesterim tańerteńnen beri habarlasyp, quttyqtap jatyr. Bul - meniń ómirimdegi eń tolqynysty kún boldy », - deıdi Móldir Tomarova.
