Aqtóbede taý-ken óndirisi damyp, qurylys materıaldary shyǵarylady
Aqtóbe oblystyq máslıhatyndaǵy «Nur Otan» fraktsııasy otyrysynda jol kartasy jobasy qaralyp, pysyqtaldy.
«2020 jyldyń 17 qazany kúni oblystyq fılıaldyń kezekten tys HHH onlaın konferentsııasynda partııa fılıalynyń saılaýaldy baǵdarlamasy qabyldanyp, bekitilgen bolatyn. Sol saılaýaldy baǵdarlamany iske asyrý úshin aldaǵy 5 jyldyqqa arnalǵan jol kartasy jasaldy. Jol kartasynyń ereksheligi sol, munda oblystyq, qalalyq jáne aýdandyq deńgeıdegi eldi alańdatqan máseleler túgel elekten ótkizilip, qamtyldy. Aldaǵy bes jylda óńirdi damytýdyń tyń jospary osy qujatta tolyq jazylǵan», - dedi Ońdasyn Orazalın.
Jol kartasyna iri jobalar engizilgen. Máselen aldaǵy bes jylda «AltynEx Company» taý-ken metallýrgııalyq kombınaty, «Aqtóbe tsement» tsement óndirý zaýyty, Qarǵaly aýdanynda 48 mVt jel elektr stantsııasy, Mártók aýdanynda 2,8 myń bas ІQM arnalǵan sútti-taýarly fermasy, Aqtóbe qalasynda múmkindigi shekteýli jandarǵa arnalǵan sport kesheni salynady. Jol kartasy jobasyna engizilgen osy jáne basqa da naqty joby fraktsııa múshelerine partııanyń oblystyq fılaly tóraǵasynyń birinshi orynbasary, fraktsııa jetekshisi Erbol Danaǵulov tanystyrdy. Onyń aıtýynsha, saılaýaldy baǵdarlama halyqpen, onyń ishinde shalǵaı eldimeken turǵyndarymen jan-jaqty talqylaý nátıjesinde daıyndaldy. Praımerız kezinde turǵyndardan 1 myńnan astam usynys tústi.
«Biz halyq pen bılikti baılanystyratyn býyn retinde halyqtyń senimi men aq- amanatyn arqaladyq. Sondyqtan da saılaýaldy baǵdarlamalarymyzdy júzege asyrý úshin elimizdiń, óńirimizdiń áleýmettik damýyn jáne halyqtyń ál-aýqatyn arttyrýǵa baǵyttalǵan naqty josparymyzdy jol kartasynyń jobasy arqyly ashyq túrde qaraýǵa usyndyq. «Nur Otan» depýtattary, barlyq saılaýaldy mindettemelerdiń oryndalýyna júıeli baqylaýdy qamtamasyz etemiz», - dedi fraktsııa jetekshisi Erbol Danaǵulov.
«Turǵyndarmen kezdesý kezinde kóp másele qozǵaldy, birneshe usynys aıtyldy. Qazir ár azamattyń ótinish-tilegi eskerilip, óńirde birneshe joba qolǵa alyndy. Qorshaǵan ortaǵa qaýipti munaı qaldyqtaryn qaıta óńdeıtin zaýyt salynady. Múmkindigi shekteýli jandarǵa arnalǵan sport kesheni de boıy kóteredi», - dedi fraktsııa múshesi Evgenıı Lazarchýk.
