Aqtóbede tasymaldaýshylar ekonomıkalyq tıimsiz shaǵyn aýdandar úshin avtobýs sanyn kóbeıtpedi
Oblystyq sybaılas jemqorlyqqa qarsy qyzmet departamenti janyndaǵy arnaıy monıtorıng tobynyń ókilderi kólik ınspektsııasy, Aqtóbe qalasynyń turǵyn úı - kommýnaldyq sharýashylyq jáne avtomobıl joldary bóliminiń qyzmetkerlerimen birge qoǵamdyq kólik qozǵalysyna birlesken monıtorıng júrgizdi.
Monıtorıng saǵat 7:00 men 9:00 aralyǵynda ótti. Bul ýaqytta jumysqa asyqqan adam sany kóp, al avtobýs az. Máselen, qalanyń NurAqtóbe yqsham aýdanynda 40 myńnan astam halqy bar. Arnaıy monıtorıng tobynyń ókilderi bólingen bes avtobýs halyq tyǵyz qonystanǵan aýdannyń azamattaryn tasymaldaý úshin jetkiliksiz dep esepteıdi.
Qazir jumysqa asyqqan turǵyndar lyq toly avtobýsqa minýge májbúr. Bul ınfektsııanyń taralý qaýpin kúsheıtedi. Arnaıy monıtorıng toby músheleriniń ótinishi boıynsha qalalyq Turǵyn úı - kommýnaldyq sharýashylyq jáne avtomobıl joldary bóliminiń ókili S.Іdiris tasymaldaýshy seriktestik basshysymen telefon arqyly sóılesti. Kásiporyn basshysy bul yqsham aýdanǵa qosymsha avtobýstar bólý ekonomıkalyq turǵydan tıimsiz ekenin aıtyp, bas tartty.
«Tótenshe jaǵdaıda azamattarymyzdyń densaýlyǵy qandaı da bir ekonomıkalyq paıdadan mańyzdy dep oılaımyz. Kásiporyn basshylyǵy osyndaı qıyn ýaqytta bizdiń turǵyndarǵa qoldaý kórsetedi degen úmittemiz. Monıtorıng qorytyndysy boıynsha qala ákimdigine tańǵy jáne keshki ýaqytta avtobýstardyń sanyn kóbeıtý boıynsha sharalar qabyldaý jóninde usynys beremiz», - dep atap ótti AMT basshysy Táttigúl Talaeva.
Óz kezeginde óńirlik arnaıy monıtorıng toby turǵyndardan memleket belgilegen shekteýdi saqtaýǵa shaqyrady.
