Aqtóbede tasyǵan ózender óz deńgeıine túse bastady
AQTÓBE. QazAqparat - Aqtóbedegi úsh iri sý qoımasyna jınalǵan qar sýy ózenderge aǵyzylyp jatyr. Qazirgi kezde 600-ge jýyq aýla men úı sý astynda qaldy, dep habarlaıdy QazAqparat tilshisi.
Aqtóbedegi oblystyq tótenshe jaǵdaılar qyzmeti óńirdegi barlyq ózenderdiń deńgeıi tústi dep aqparat taratty. Biraq iri sý qoımalaryna daladan kelip jatqan sý toqtaǵan joq. Sondyqtan Aqtóbe qalasy mańyndaǵy Sazdy sý qoımasynan sekýndyna 20 tekshe metr, Aqtóbe sý qoımasynan sekýndyna 540 tekshe metr, Qarǵaly sý qoımasynan sekýndyna 400 tekshe metr sý jiberilip jatyr. Eń iri Qarǵaly sý qoımasy keshe ashyldy. Qoıma 96 paıyzǵa tolyp tur.
«Qarǵaly sý qoımasy ashyldy. Biraq qaýip joq. Sebebi ózenderdiń deńgeıi tústi, qala mańyndaǵy sý qoımalarynan jiberiletin sý mólsheri de azaıyp keledi. Ári Qarǵaly sý qoımasynan jiberilgen sý qalaǵa eki kúnde keledi. Demek ózenderdiń deńgeıi tómendegen kezge dál túsip tur»,- dep sendirdi oblystyq tótenshe jaǵdaılar departamentiniń basshysy Baýyrjan Syzdyqov.
Aıta keteıik, búgingi málimet boıynsha Aqtóbedegi baý-baqsha ujymynda 579 úı men aýlany sý basty. Bes úı qulap qaldy. Barlyǵy 1 myńnan astam adam evakýatsııalanyp, 69 adam qutqaryldy. Baspanasy sý astynda qalǵan adamdar qaladaǵy tórt mektepke ornalastyryldy. Onda qazir 500-den astam adam jatyr. Al 700-ge jýyq adam týystaryn jaǵalap júr.
«Saıajaı aýmaǵyna úı salýǵa ruqsat bergen kim? Úılerdiń qujaty bar ma? Osy suraqtar arnaıy qurylǵan komıssııa tekserýi kezinde anyqtalatyn bolady. Sebebi, ózen jaǵalaýlary baý-baqshaǵa arnalǵan. Adamdar jyl saıyn qaýip tónetinin túsinýi kerek»,- dedi Baýyrjan Syzdyqov. 
