Aqtóbede tasqyn sýdyń deńgeıi tómendedi
AQTÓBE. QazAqparat - Aqtóbe oblysynda sý tasqynynyń jaǵdaıy jaqsaryp, onyń zalalyn azaıtý jumystary jalǵasyn tabýda. Sońǵy táýlikte 47 saıajaılyq úıler men aýlalardy sý basty.
397 adam (sonyń ishinde 29 bala) evakýatsııalanyp, 1 adam qutqaryldy. Bul týraly QR ІІM Tótenshe jaǵdaılar komıtetiniń resmı ókili Rýslan Imanqulov habarlady.
Keshe saǵat 09:20-da Aqtóbe qalasy Keńes Nokın atyndaǵy kentte Qarǵaly ózenindegi sý deńgeıiniń kóterilýi saldarynan «Nadejda» baǵbandyq ujymynda saıajaılyq úılerdi sý basý qaýpi tóndi. Qutqarýshylardyń kúshimen 11 adam, sonyń ishinde 5 bala evakýatsııalanyp, beketterge jaıǵastyryldy.
13:35-te Sadovyı kentindegi «Solnyshko», «Neftıannık» baǵbandyq ujymynda 47 saıajaılyq úıler men aýlalardy sý shaıyp ketti. 364 adam, sonyń ishinde 18 bala evakýatsııalanyp, 500 ydysqap tóseldi. 50 adam beketterge ornalastyrylsa, qalǵany týystaryna jetkizildi.
16:00-de Aqtóbe qalasy Ýkraınka kentinde Qarǵala ózeniniń arnasynan asýy saldarynan «Taý» demalys bazasyn sý aldy.Jedel-qutqarý jasaǵynyń kómegimen 1 adam qutqaryldy.
Akjar-1 kentinde, «Neftıannık - 4», «Býrovık», «Solnyshko» baǵbandyq ujymdarynda apattyq-qutqarý jumystary júrgizildi. Saıajaılarda sý tasqyny oryn alǵaly beri 1907 adam, ótken táýlikte 397 adam evakýatsııalandy.
Aqtóbeniń birqatar aýdandaryn shaıǵan úlken kólemdegi sýdyń deńgeıi qazirgi tańda tómendeı bastady.
