Aqtóbede tasqynnan qıraǵan úıler qashan buzylady
AQTÓBE. KAZINFORM – Turǵyndar balalary úshin alańdap, mektepke barar, úıge keler kezde shyǵaryp salyp, kútip alyp júr. Keıde polıtsııadan da kómek suraıdy.
Kún saıyn jınalyp, ishimdik ishedi, uıyqtaıdy — Ulmeken apa
2024 jylǵy sý tasqyny kezinde Aqtóbe qalasy Abrıkos baý-baqsha ujymyndaǵy 10-nan astam úı qırap qaldy. Samannan salynǵan úıdiń bári jaramsyz bolyp, ıeleri tek eń qajettisin alyp ketken.
Arada jyldan astam ýaqyt ótkende apatty úılerdiń qabyrǵasy sógilgenimen, keshkilik ishimdik ishetin adamdar jınalatyn orynǵa aınaldy. Turǵyndar dabyl qaǵyp, balalardyń qaýipsizdigine alańdap otyr.
— Bul jer balalar úshin qorqynyshqa toly. Adamdar tústen keıin jınalyp, ishimdik ishedi, uıyqtap ta alady. Dál osylaı júrgenderine 3-4 aıdyń júzi boldy. «Abrokos» baý-baqsha ujymynyń tóraǵasy qalalyq ákimdikke aıtatyn boldy. Tez buzyp, tazartýyn suraımyz. Bul jerge adamdar qoqys ta laqtyryp jatyr, — dedi Ulmeken apa.
Onyń aıtýynsha, jazǵy demalys kezinde balalar aýlada bolsa, qazir mektepke barady, ári-beri ótedi. Bári de jalǵyz júrýden qorqyp qalǵan.
— Polıtsııa da shaqyryp, ýchaskelik ınspektor qýyp jiberip júrdi. Bir kúnnen soń qaıta jınalyp otyrady. Bári osy baý-baqsha ujymdarynyń adamdary. Úıi bar ma, joq pa ony anyq bilmeımin. Іship otyrady bári qosylyp, — dedi ol.
Dúkennen nan alyp kelýge qorqatyn kúnderimiz bolady — Sveta Aısaýytova
Jasy 70-ten asqan Sveta Aısaýytova buǵan deıin «Abrıkos» baý-baqsha ujymynyń tóraǵasy qyzmetin atqardy. Ondaǵan úıdiń basyn biriktirip, gaz, jol, elektr togy sekildi problemalyq suraqtardy sheshýmen aınalysty.
Sońǵy kezderi bul jumys qıynǵa soǵyp, ózgege tapsyrdy. Degenmen saıjaı aýmaǵyndaǵy barlyq problemany biledi, turǵyndarymen de tanys.
— Kúndiz de, keshkilik te syra, araq iship otyrady. Sodan «beınebaqylaý kamerasyn qoıdym» dep aıtyp qoıdym. Qazir munda jınalmaıdy. Bizdiń úıimizden ári qaraı da birneshe úı qırap jatyr. Balalar mektepke barǵan kezde atasy men ájesi, ata-anasy barlyǵy kútip júredi. Al qaýipsiz aýmaq bolsa avtobýstan túsip, ózderi-aq úıine barar edi. Úıdi buzý kerek. Olar qajetti múlkin aldy da ketti. Ákimdikke de aıtyldy bul másele, — dedi Sveta Aısaýytova.
Onyń aıtýynsha, tek er adamdar emes, áıelder de qırandy mańyna jınalýǵa áýes.
— Úıden shyǵýǵa qorqamyz. Nan bitip qalsa dúkenge barmaı, úıde otyramyz. Arasynda tokty da, gazdy da ajyratpaı ketkender bar. Keıde bul jerlerge balalar da oınaıdy. Óte qaýipti. Bul jaqqa negizi oıyn alańy da kerek, — dedi ol.
Qıraǵan úılerdi súrýge 250 mln teńge bólindi — ákimdik
Aqtóbe qalasy ákiminiń baspasóz qyzmetiniń habarlaýynsha, Almaty aýdanynyń ákimdigi konkýrstyq rásimderdi aıaqtaǵan. Mediger — «Baltest» JShS.
Saıajaı úılerin súrý jumystary jaqyn arada bastalady. Biraq dál qaı kúni ekeni belgisiz.
Memlekettik satyp alý portalynan Almaty aýdany ákimdiginiń tapsyrysy jaıly aqparat izdedik.
Shyn máninde konkýrs aıaqtalǵan, sonymen birge tazartý jumystaryn óz mindetine alǵan merdigerge qoıylar talap jaıly aqparat ta bar. Munda № 1 jáne № 2 lottyń qujattaryn ashyp qaraýǵa bolady.
Birinde 105 úıdi, ekinshisinde 86 úıdi súrýge kelisim jasaldy. Eki lottyń qanjysy 250 mln teńge bolady.
— Buzý obektisiniń aýmaǵyn ýaqytsha qorshaý, ınjenerlik jeliler men kommýnıkatsııalardy (elektrmen jabdyqtaý, sýmen jabdyqtaý, gazdandyrý, jylýmen jabdyqtaý, káriz, radıotelefon jelileri jáne t. b.) ajyratý, kran joldaryn tóseýge arnalǵan oryndardy daıyndaý (eger smetalyq qujattamada júk kótergish mehanızmderdi paıdalaný kózdelgen jaǵdaıda), — dep jazylǵan qujatta.
Sonymen birge súrý jumystary kezinde shań kóterilmes úshin únemi sý shashyp turý mindetteldi.
Keshkilik jaryqtandyrylyp, tasymaldaý kezinde júk kólikteri tasjoldy lastamas úshin dóńgelek jýý qyzmeti de uıymdastyrylýy kerek.
— Jumys oryndaryn, ótkelderdi, ótý joldaryn uıymdastyrý, qaýipsizdik tehnıkasy jáne eńbekti qorǵaý, ekologııalyq jáne órt qaýipsizdigi talaptaryn saqtaý, aýmaqty mehanıkalyq jáne qolmen tazalaý jáne josparlaý, jumysty oryndaý barysynda alynǵan qurylys qoqystaryn tıeý, shyǵarý jáne kádege jaratý, jer ýchaskesin tegisteý mindet, — dep jazylǵan kelisimshart qujatynda.
Qorshaýmen qatar táýlik boıy kúzet te qoıylýy tıis.
Aıta keteıik, 105 úıdi súrýge 130 mln, al 86 úıdi súrýge 120 mln teńgeden astam qarjy qarastyryldy.
Barlyǵy 191 úıdi súrý jumysy aqpanda qabyldanǵanymen merdiger endi ǵana anyqtaldy.
