Aqtóbede tasqynnan búlingen múlikti baǵalaý jumysynyń aqysy belgili boldy

AQTÓBE. KAZINFORM — Aqtóbede sý tasqynynan zardap shekken turǵyndardan ótinish qabyldanyp jatyr. Búginde baǵalaý kompanııalarynyń múlikti baǵalaý quny belgili boldy.

Aqtóbe oblysy boıynsha 529 úıdiń jaramsyz kúıge túskeni belgili. Qazir jańasy salý jumystaryna shamamen 22 mlrd teńge jumsalady degen boljam bar. 

Al múliktik shyǵyndy esepteý úshin ár úıge shamamen 130 myń teńge jumsalady. 

— Shtab otyrysyna baǵalaý palatasynyń baǵalaýshylary shaqyryldy. Olar alǵashqyda bir úıdi, ondaǵy múlikti baǵalaý qunyn 85 myń teńge dep aıtty. Keıin biz Qazaqstannyń ózge oblystaryndaǵy baǵany surap, túrkistandyq baǵalaýshylardyń qyzmet aqysyn bildik. Olar 50 myń teńge dep otyr. Aqtóbelik mamandarmen kelisip, 50 myń teńgege kelisim júrdi. Biz baǵalaýshylardyń ár zatty qarap, qunyn shyǵaratynyn umytpaýymyz kerek. Tek úıdi 25 myń teńgege baǵalaıdy. Tońazytqyshty baǵalaý úshin 5 myń teńge, kir jýý mashınasy bolsa taǵy 5 myń teńge. Biz 50 myń teńge beremiz, oǵan jyljymaly jáne jyljymaıtyn múlik qosylady dep otyrmyz. Al tehnıkalyq tekserýdiń bastapqy baǵasy 145 myń teńge boldy, ony 80 myń teńgege kelistik. Bir úıge sonda 130 myń teńge shyǵyp otyr, — dedi Aqtóbe qalasy ákiminiń orynbasary Qaırat Qýantaıuly.