Aqtóbede tasqyn kezinde halyqqa kómekke kelgen medıtsına qyzmetkerleri marapattaldy
AQTÓBE. KAZINFORM — Aqtóbede Medıtsına qyzmetkerleri kúni qarsańynda 100-den astam sala mamany marapattaldy. Olardyń arasynda óz úıi sýǵa ketse de turǵyndarǵa kómek kórsetken aq halattylar da bar.
Aqtóbe qalasynda medıtsına qyzmetkerleri kúnine arnalǵan merekelik shara ótti.
Onda aq halattylarǵa Aqtóbe «Eńbek ardageri» medali, «Densaýlyq saqtaý isiniń úzdigi», «Densaýlyq saqtaý isine qosqan úlesi úshin» tósbelgileri, QR Densaýlyq saqtaý mınıstrliginiń Qurmet gramotasy, oblys ákiminiń Alǵys haty tabystaldy.
Sý tasqyny kezinde turǵyndarǵa kómek kórsetken dárigerler men meıirbıkelerge Aqtóbe oblystyq densaýlyq saqtaý basqarmasy men Aqtóbe oblystyq TJD alǵys hat tabystady.
Barlyǵy 20-ǵa jýyq aq halatty alǵysqa bólendi.
— Men Nura aýylynda 37 jyldan beri jalpy tájirıbeli dáriger bolyp eńbek etip kelemin. Zeınetke shyqqanyma 4 jyl boldy. Biraq aýylda maman jetispeı, qyzmetimdi jalǵastyryp júrmin. Kóktemde Yrǵyz aýdanynda sý tasqyny boldy. Sol kezde júkti áıeldi aýylda bosandyryp aldyq. Ana men bala ómirin saqtap qaldyq. Janymda eki medbıke boldy. Al aýyl, úıimiz sýǵa ketti. Eki aı boıy sýda tur. Biz bolsaq Yrǵyz aýdany ortalyǵynda jumys istep júrmiz. Qıyn bolsa da halyqqa qyzmet etýdi jalǵastyramyz. Aýdandyq aýrýhanada bir bólme berdi. Sonda jumysty jalǵastyryp, adamdardy skrınıngten ótkizip jatyrmyz, — dedi Yrǵyz aýdany Nura aýyldyq ambýlatorııasynyń dárigeri Sáýle Sataev.
Dáriger otbasy sheshimimen Yrǵyz aýdany ortalyǵyna kóshetin boldy. Qazir páter jaldap turyp jatyr.
— Eshteńe ala almaı, tek qujatymyzdy qolǵa ustap shyqqan edik. Úıdiń tóbesine deıin sý keledi dep eshkim oılamady. Endi jańa úıdiń salynýyn kútemiz, — dedi ol.
Jalpy Aqtóbe oblysynda 14 myńnan astam medıtsına qyzmetkeri bar. Onyń 4500-i — dáriger, 9500-den astamy — orta býyn qyzmetkeri.
— Memleketimizdiń densaýlyq saqtaý júıesin nyǵaıtýǵa arnalǵan jobalar Aqtóbe oblysynda da júzege asyp jatyr. Onyń biri — aýyldyq densaýlyq saqtaý júıesin jańǵyrtý. Ulttyq joba aıasynda 21 medıtsına mekemesi ashylady. Onyń 8-i salynyp boldy. Sonymen birge úsh aýdanaralyq kópsalaly aýrýhana salynady. Ol Muǵaljar, Shalqar, Hromtaý aýdandarynda josparlanǵan. Búgin ǵana Qarǵaly qalalyq aýrýhanasynda statsıonar ashyldy. Sonymen birge Stımýlıatsııalyq ortalyq qoldanysqa berildi, — dedi Aqtóbe oblystyq densaýlyq saqtaý basqarmasynyń basshysy Erbol Tympıev.
