Aqtóbede tarıhı-mádenı 27 ǵımarat erekshe qorǵaýǵa alyndy
AQTÓBE. QazAqparat - Aqtóbe qalasy Almaty aýdandyq prokýratýrasy zań boıynsha qorǵalatyn tarıhı-mádenı nysandarǵa taldaý júrgizdi. Taǵy 27 nysan tizimge irikti, dep habarlaıdy QazAqparat tilshisi.
2022 jyldyń basynda Aqtóbe qalasynda tarıhı mańyzy bar 9 nysan qorǵaýda boldy.
Degenmen prokýrorlar taldaý jasaý kezinde mádenı-tarıhı qundy ǵımarat sany odan da kóp ekenin anyqtady.
Qundy dúnıelerdi saqtaýda salǵyrttyqqa jol berýge bolmaıdy degen tujyrymda prokýrorlar.
«Mádenı-tarıhı mańyzy bar ǵımarat der kezinde qorǵaýǵa alynýy kerek. Taldaý júrgizý kezinde taǵy 27-i nysan anyqtaldy. Máselen Aqtóbe qalasy Altynsarın kóshesindegi balalar shyǵarmashylyq úıi 1913 jyly salynǵan. Al Janqoja batyr kóshesindegi shirkeý 1915 jyly boı kótergen. Qalanyń tarıhı qalpyn saqtaýǵa múmkindik beretin turǵyn úıler Turǵyn úı qalashyǵy, Áýe qalashyǵy jáne qalanyń eski bóliginde ornalasqan»,- dedi Aqtóbe qalasy Almaty aýdanynyń prokýrory Jasulan Dáýlembaev.
Aıta keteıik, taldaý kezinde Aqtóbe qalasynda arheologııalyq 168 nysannyń qujaty joq bolyp shyqty.
Prokýrorlar quzyrly organdarǵa zańsyzdyqty joıý jóninde uıǵarym berdi.
