Aqtóbede tańǵy asqa nan ǵana berilgen balabaqshanyń máziri tekserilip jatyr
AQTÓBE. QazAqparat - Aqtóbede «Madok» balabaqshasy tekserilip jatyr. Oǵan ata-analardyń shaǵymy negiz bolǵan, dep habarlaıdy QazAqparat tilshisi.
Aqtóbede memlekettik tapsyrysty oryndap otyrǵan «Madok» balabaqshasynyń as máziri tekserilip jatyr. Sebebi, ata-ana balalaryna ystyq tamaqty ornyna nanǵa shokoladty maı jaǵyp bergenin aıtyp, qalalyq bilim bólimine aryz túsirdi.
«Balam buǵan deıin balabaqshada qaraqumyq jeıtinin aıtyp júrdi. Biraq balabaqshada tamaqtyń ıisi múlde shyqpaıdy. Kishkentaı bolǵan soń kórgen-bilgenin durys jetkize almaıdy dep oıladym. Taǵy suraǵanda qaraqumyq jeıtinin aıtyp, sózinen tanbady. Senbedim, bir kezde áleýmettik jeli arqyly vıdeo men sýret tarap ketti. Kún saıyn tamaǵyna dep 500 teńge tóleımin. 2 jylǵa jýyq kelip júrgenimizben men balalarymdy alyp ketýge uıǵardym. Bul jerde balama nanǵa maı jaǵyp, qara shaı bergen. Tańǵy asy osy. Al mázir boıynsha tańǵy asqa botqa berýi tıis», - dedi eki balasyn atalmysh balabaqshaǵa aparyp júrgen Alına Ubaıdýllına.
Búgin balabaqshaǵa qalalyq bilim bóliminiń arnaıy komıssııasy kelip, tekserýdi bastady.
«Memlekettik tapsyrys negizinde jumys istep jatqan «Madok» balabaqshasyndaǵy ata-anadan shaǵym tústi. Shaǵym negizinde komıssııa qurylyp, tekserý bastaldy. Ata-ana tamaq, oqý protsesine kóńili tolmaıdy. Buǵan deıin balabaqshaǵa qatysty shaǵym bolmady», - Aqtóbe qalalyq bilim bóliminiń bas mamany Gúljan Ámirova.
Kelisimshart boıynsha arnaıy nusqaý berilip, kemshilikterdi joıýǵa belgili bir ýaqyt bekitiledi. Kemshilikter joıylsa balabaqsha jumysyn jalǵastyrady, eger oryndalmasa qalalyq bilim bólimi eki aradaǵy kelisimshartty buzady.
«Ata-ana men balabaqsha arasynda túsinispeýshilik boldy. Ekinshi tańǵy as kezinde ata-ananyń biri telefonǵa túsirip alyp, ony jelige taratyp jibergen. «Bul birinshi tańǵy as» dep berip, qate aqparat taratty. Osy jaǵdaıdan keıin tekserý bolyp, balalarǵa shokoladty maı berýge bolmaıtyny aıtyldy. Balabaqshaǵa sógis jarııalandy», - dedi «Madok» balabaqshasynyń quryltaıshysy Tolqyn Shektibaeva. Balabaqshada tórt mezgil tamaq beriledi. Quryltaıshy ata-analardyń qaryzy kóp bolǵanymen ortaq talap boıynsha tamaqtandyratynyn jetkizdi.
«Ata-analardyń qaryzyn naqty, tipti jobalap aıta almaımyz. Biz memlekettik tapsyrysty oryndaımyz, qazir tek ata-analar ǵana bizge qaryz», - dedi Tolqyn Shektibaeva. Al Aqtóbe qalalyq qoǵamdyq densaýlyq saqtaý basqarmasy jeke balabaqsha bolǵan soń ata-anadan aryz tússe ǵana tekserý júrzile alamyz dep otyr.
«2017 jyldyń aqpan aıynda «Madok» balabaqshasyna sanıtarlyq-epıdemıologııalyq qorytyndy berildi. Kásipkerlik kodeksine sáıkes úsh jyl boıy tekserý júrgizýge quqyǵymyz joq. Aqtóbe oblystyq nemese qalalyq qoǵamdyq densaýlyq saqtaý basqarmasyna aryz túspedi. Jospardan tys tekserý júrgizý úshin ata-anadan aryz túsýin kútemiz», - dep habarlady oblystyq qoǵamdyq densaýlyq saqtaý departamentiniń baspasóz qyzmeti.
