Aqtóbede tańerteń jáne keshke qatynaıtyn qoǵamdyq kólik sany artady
AQTÓBE. QazAqparat – Aqtóbe qalasynda karantın shekteýine baılanysty tańerteń jáne keshke avtobýs sany artady, dep habarlaıdy QazAqparat tilshisi.
Aqtóbe qalasynda 11 monıtorıng top bar. Olardyń quramyna memlekettik qyzmetkerler, depýtattar men qoǵamdyq keńes músheleri endi. Jyl basynan beri qalada 300-den astam tekserý júrgizildi. Barlyǵy 140 buzýshylyq anyqtaldy.
«Jınalǵan materıal qalalyq sanıtarııalyq-epıdemıologııalyq baqylaý basqarmasyna joldandy. Barlyǵy 60-tan astam sýbektke 10 mıllıon teńgege jýyq aıyppul salyndy. Qoǵamdyq kólik máselesi jıi qozǵalady. Jumysqa baryp, keletin ýaqytta marshrýt sanyn kóbeıtý baǵytynda jumys atqarylyp jatyr. Osy arqyly avtobýsta karantın rejımin saqtaýǵa kúsh salamyz. Jolaýshylar maska taqpaıdy. Bul derek boıynsha túsindirý jumysyn júrgizemiz. Júrgizýshige qosyshma maska berýdi, jolaýshyda joq bolsa, taratýdy usynyp otyrmyz», - dedi qala ákiminiń orynbasary Sergeı Lı.
Mobıldi topqa polıtsııa qyzmetkerleri kómek kórsetedi. Olar táýlik boıy jumys isteıdi.
«Kásip ıeleri, meıramhana ákimshileri mobıldi top múshelerine, tipti polıtsııa qyzmetkerlerine baǵynbaı, qarsylyq kórsetedi. Ákimshilik quqyqbuzýshylyq týraly kodekske sáıkes olar jazalanyp jatyr. Aıyppul tólep, qamalǵandar da boldy», - dedi oblystyq jergilikti polıtsııa qyzmeti basqarmasynyń bastyǵy Ardana Saımaǵambetov.
