Aqtóbede talapqa saı kelmeıtin sút, balyq ónimderi kóp ekeni anyqtaldy
AQTÓBE. QazAqparat - Aqtóbede jyl basynan beri ónim qaýipsizdigi monıtorıngi aıasynda saýda nysandarynan tamaq ónimderiniń 744 úlgisi iriktelip, satyp alynyp, zertteldi, dep habarlaıdy QazAqparat.
Aımaqtaǵy sanıtarııalyq-epıdemıologııalyq baqylaý departamenti mamandarynyń málimetinshe, onyń 229-y otandyq óndirýshilerdiki bolsa, 465-i EAEO-ǵa múshe memleketterden kelgen, 50-i basqa elderden ımporttalǵan.
«Onyń ishinde 72 synama nemese 9,7%-y tehnıkalyq reglamentterdiń talaptaryna sáıkes kelmedi. Munyń 20-sy otandyq óndirýshilerge, 48-i EAEO-ǵa múshe memleketterge, 4 synama basqa el ónimderine tıesili. Taǵam ónimderiniń kóbisinde óndirýshiler tańbalaý erejelerin buzǵan. Sút jáne sút ónimderiniń qatarynda sapasyzdar kóp, 93 synamanyń 12-si talapqa saı emes. Balyq jáne balyq ónimderiniń 36 synamasynyń 11-i talapqa saı kelmeıdi. Osyndaı olqylyqtar qus, et jáne kondıterlik ónimderden de baıqaldy», - dep jazdy vedomstvodan.
Departament bıyldyqqa 2 jospardan tys tekserý júrgizip, quqyq buzýshylyqtardy joıý týraly 38 uıǵarym bergen. Kásipkerlik sýbektilerine 183 780 teńge somasyna 4 aıyppul salyndy.
