Aqtóbede tal túste er adamdy beıtanys bireý pyshaqtap ketti

AQTÓBE. KAZINFORM – Aqtóbede er adamdy beıtanys bireý balalarynyń kózinshe pyshaqtaǵan. Qazir jábirlenýshi aýrýhanada em alyp jatyr. 

Aqtóbe qalasynyń turǵyny áleýmettik jelide kúıeýin belgisiz adamnyń pyshaqtap ketkenin jazdy. 

Oqıǵa keshe saǵat 15:00 shamasynda bolǵan. Aqtóbe qalasynyń negizgi dańǵyldarynyń birinde onyń balalaryna egde jastaǵy er adam tıisken. Úlken uly 5 jasar inisiniń janynda júrgen kezde ákesi jumystarymen ketip qalady. Sol kezde beıtanys adam balalardy sypyrǵyshpen urady. Tipti kenjesin janyna alyp, úlkenin oǵan jolatpaǵan. Sol kezde ákesi kelip, beıtanys adamdy sabyrǵa shaqyrady. Degenmen eki er adam kelise almaı, 69 jastaǵy kúdikti er adamdy balalarynyń kózinshe pyshaqtaıdy. Osy oqıǵadan soń qylmystyq is qozǵalyp, tergeý júrip jatyr.

— Polıtsııa pyshaqtaý faktisi boıynsha kúdiktini ustady jáne bólimge jetkizdi. Qylmystyq kodekstiń «Densaýlyqqa qasaqana aýyr zııan keltirý» baby boıynsha sotqa deıingi tergeý júrgizilip jatyr. Qazir bultartpaý sharasy týraly másele sheshilip jatyr, — dep habarlady oblystyq PD baspasóz qyzmeti.

Aıta keteıik, keýde tusynan pyshaq jaraqatyn alǵan jábirlenýshi Aqtóbe oblystyq kópsalaly aýrýhanasynyń hırýrgııa bólimine jetkizilip, ota jasaldy. Qazirgi kezde naýqastyń jaǵdaıy ortasha aýyr. Naýqas esin biledi jáne em qabyldap jatyr. Ázirge oqıǵaǵa ne sebep bolǵany aıtylmady.

Eske salsaq, Aqtóbede balasy úshin ákesi jaza arqalady. Jasóspirim telefon urlap, ákesi 5 táýlikke qamaldy.