Aqtóbede taksı júrgizýshisin óltirip, kóligin aıdap ketken kúdiktiler ustaldy

AQTÓBE. QazAqparat - Aqtóbede adam óltirip, taksı júrgizýshisiniń kóligin aıdap ketti degen kúdikke ilikkender ustaldy, dep habarlaıdy QazAqparat tilshisi.

Polıtsııaǵa «Hyundai» avtokóliginiń júrgizýshisi ara qashyqty saqtamaı, alda kele jatqan jeńil kólikpen soqtyǵysyp, oqıǵa ornynan qashyp ketkeni týraly habarlama tústi. «Beınekameralardyń kómegimen atalǵan kóliktiń ornalasqan jeri anyqtaldy. Patrýldik ekıpajdyń biri kólikti taýyp, júrgizýshiden kólikti toqtatýdy talap etti. Biraq olar buıryqqa baǵynbaı, qasha bastady. Joldyń qarsy baǵytyna shyǵyp, «Toyota Land Cruiser-200″ avtokóligimen soqtyǵysty», – dedi Aqtóbe qalalyq polıtsııa basqarmasynyń bastyǵy Baýyrjan Atabaev.

Ekeýi de mas kúıinde kólikke otyrǵan. Biri 19, ekinshisi 37 jasta.

Kóliktiń basqa adamǵa tıesili ekeni anyqtaldy. Sol sebepti polıtseıler ustalǵandardy tergeı bastady. Kólikti tekserý kezinde rýl men tósenishterden qońyr tústi daq anyqtalyp, kúdik týdyrdy.

Artqy oryndyqtyń jamylǵysynda da daq boldy. Keıin polıtsııa qyzmetkerleri salonnan qan juqqan pyshaq tapty. Tergeý kezinde ustalǵandardyń biri birneshe saǵat buryn júrgizýshini óltirip, kólikti urlap ketkenin moıyndaǵan.

QR Qylmystyq kodekstiń «Adam óltirý» jáne «Qaraqshylyq» baptary boıynsha sotqa deıingi tergeý bastaldy. Qylmys jasady degen kúdikke ilikken eki adam ýaqytsha ustaý ızolıatoryna qamaldy.