Aqtóbede taqyrǵa aınalǵan jaıylym jerdi qalpyna keltirý jumysy bastaldy
AQTÓBE. KAZINFORM — Muǵaljar jáne Áıteke bı aýdandarynyń sharýalary jer jyrtý jumysyn bastady. Olarǵa kópjyldyq shópterdiń tuqymy taratyldy.
BUU-nyń Azyq-túlik jáne aýyl sharýashylyǵy uıymy men Qazaqstan ekologııalyq uıymdary qaýymdastyǵynyń «Klımattyq turaqtylyqty qamtamasyz etý jáne jaıylymdyq alqaptardy qalpyna keltirýge arnalǵan agrolesomelıoratsııa» jobasy Aqtóbeden bastaldy. Oblystaǵy Áıteke bı jáne Muǵaljar aýdandarynda eki aýyldyq okrýg aýmaǵy tańdaldy. Onda 7 sharýamen arada kelisimshartqa qol qoıylyp, búginde jer jyrtý jumysy júrip jatyr.
— Muǵaljar aýdany boıynsha 275 gektar jerdi jyrtý, kópjyldyq shóptiń tuqymyn sebý jumysy atqarylady. Qazirgi ýaqytta tuqym men jer jyrtý qurylǵysy ákelindi. Endi janar-jaǵarmaıy jetkiziledi. Uıymdastyrýshylar osy qajettiliktiń bárin berdi. Al tórt sharýa osy jumystardy úılestiredi. Bul sharýalar úshin eń tıimdi jol bolýy múmkin. Sebebi jaıylym jerde shyǵym az. Alǵashynda adamdar kúmánmen qaraǵan edi. Al qazir tórt sharýa iske kirisken kezde ózgeler de surap jatyr. Bıyl kúzde tuqym sebedi, keler jyly shyǵymy jaıly bilemiz, — dedi Muǵaljar aýdany Taldysaı aýyldyq okrýginiń ákimi Aıbek Muhanov.
Al Áıteke bı aýdany boıynsha Araltoǵaı aýyldyq okrýginiń úsh sharýasy tańdaldy. Munda da jer jyrtý jumysy bastaldy.
— Joba sarapshylary Araltoǵaı jáne Taldysaı aýyldyq okrýgterinde jergilikti fermerlermen birlesip, erkekshóp pen túıejońyshqa sııaqty malazyqtyq daqyldardyń egistigine arnalǵan tájirıbelik úlgi alqaptaryn qurdy. Zamanaýı aýyl sharýashylyǵy tehnıkasyn, sonyń ishinde chızeldi soqany paıdalanyp, tuqym ǵylymı negizdelgen ádisteme boıynsha sebildi. Bul jumys fermerlerdiń úlken qyzyǵýshylyǵyn týdyrdy, — dep habarlady Qazaqstannyń ekologııalyq uıymdarynyń qaýymdastyǵy.
Eske salsaq, elimizde 30 mln gektar jaıylym tabıǵat áserinen, al 27 mln gektar jer mal taptaǵannan jaramsyz kúıge tústi. Kazinform tilshisi osy jerlerdi qalpyna keltirýge arnalǵan pılottyq jobanyń qalaı bastalyp, qandaı jumys atqarylyp jatqanyn anyqtap bildi.
Keıin Aqtóbeniń eki aýdanynda taqyrǵa aınalǵan jaıylymǵa erkekshóp pen jońyshqa egiletini belgili boldy.