Aqtóbede taǵy eki oqýshydan koronavırýs ınfektsııasy anyqtaldy
Aqtóbe oblysy boıynsha sońǵy táýlikte 10 adamnan koronavırýs ınfektsııasy anyqtaldy. Onyń 8-i Aqtóbe qalasy, ózgesi Muǵaljar men Alǵa aýdandarynyń turǵyny. Vırýs juqtyrǵandardyń ekeýi mektep oqýshysy.
«Jalpy sońǵy aptada 4 oqýshydan koronavırýs ınfektsııasy anyqtaldy. Onyń ekeýi keshe tirkeldi. Bári Aqtóbe qalasyndaǵy mektepte bilim alyp júrgen bala. Qazirgi ýaqytta №64 mekteptiń 6 synyby, №9 mektep-lıtseıiniń 2 synyp, №20 mekteptiń 3, 2 synyp oqýshylary karantınge alynyp, synyptar 14 kúnge qashyqtan oqytýǵa jiberildi», - dedi oblystyq sanıtarlyq-epıdemıologııalyq baqylaý departamenti basshysynyń orynbasary Muhtar Serbaev.
Aıta keteıik, 1-qyrkúıekten bastap barlyǵy 365 adamnan koronavırýs ınfektsııasy tirkelgen. Onyń 36-y bala.
«Qazir koronavırýs ınfektsııasyn juqtyrǵan 20 adam aýrýhanada jatyr. Ekeýi jansaqtaý bóliminde. Al 400-den astam adam úı karantınine alynǵan. Pnevmonııa boıynsha 41 naýqas em qabyldap jatyr», - dedi oblystyq densaýlyq saqtaý basqarmasy basshysynyń orynbasary Nurlan Qojın.