Aqtóbede taǵy bir jel elektr stansasy salynady
AQTÓBE. QazAqparat – Aqtóbede ınvestorlardy tartý jáne óńirdiń ınvestıtsııalyq ahýalyn jaqsartý jónindegi óńirlik keńestiń kezekti otyrysy ótti. Jıynda Eni» kompanııasynyń Qazaqstandaǵy ókili jel elektr stansasynyń ekinshi kezeńiniń jobasymen tanystyrdy, dep habarlaıdy QazAqparat tilshisi.
Jel elektr stansasynyń qurylysy Qarǵaly aýdanynda júrip jatyr. Búgin óńirde ótken ınvestorlarmen kezdesýde «Eni» kompanııasynyń Qazaqstandaǵy menedjeri Bekerýchchı Djovannı qurylys-montaj jumysymen tanystyrdy. Onyń aıtýynsha, bul oblystaǵy alǵashqy jel elektr stansasy bolǵanymen «Eni» kompanııasynyń álemdegi tuńǵysh jobasy. Sondyqtan ınvestorlar únemi baqylap, qurylys barysymen tanysyp otyrady.
«Elektr stansasynyń qýattylyǵy - 48 MVt. Investıtsııa aýqymy – 100 mıllıon dollar. 2018-2020 jyldarǵa josparlanǵan joba 20 myń turǵyndy jaryqpen qamtamasyz etýge jetedi. Stansa jyl sońynda iske qosylady. Qazir 450 adam jumys istep jatyr. Stansa iske qosylǵan kezde 15 adam turaqty eńbek etedi. Al elektr stansasynyń ekinshi kezeńi de 48 MVt qýattylyqty quraıdy. Qurylys jumystary 2021 jyly aıaqtalady. Ol jobanyń qurylysyna 90 mıllıon dollar jumsalmaq. ıAǵnı, aldaǵy 25 jylda jel elektr stansasy jumys isteıdi», - dedi Bekerýchchı Djovannı.
Aıta keteıik, oblysta Túrkııa, Qytaı, Ońtústik Koreıa, Germanııa, Nıderlandy sekildi elderdiń 900-den astam sheteldik kompanııasy jumys isteıdi. Ótken jyldyń ózinde óńdeý jumystaryna 52 mlrd teńge ınvestıtsııa salyndy. Bıyl kólemi 140 mlrd teńge bolatyn 25 jańa ınvestıtsııalyq jobany engizý kózdelip otyr. 2019 jyldyń 9 aıynyń qorytyndysy boıynsha oblys ekonomıkasynyń ınvestıtsııa kólemi 371,6 mlrd teńgeni nemese 102,3% artqan.
«Bizdiń aldymyzda ekonomıkalyq áleýetti arttyrý, otandyq jáne sheteldik ınvestorlardy tartý, jumys oryndaryn qurý jáne salyq salý bazasyn keńeıtý jónindegi jumysty kúsheıtý mindeti tur. Osyǵan baılanysty salalyq basqarmalarǵa, «Qazaq Invest» kompanııasynyń óńirlik ókildigine, «Aqtóbe» ÁKK» AQ ekonomıkanyń túrli sektorlaryna ınvestıtsııalar tartý jónindegi jumysty kúsheıtý qajet. Osy jyldyń sońyna deıin óńir ekonomıkasyna shamamen 600 mlrd teńge, 2020 jylǵa qaraı 800 mlrd teńgege deıin, 2024 jylǵa qaraı 1,6 trln teńge tartý kózdelip otyr», - dedi oblys ákimi Ońdasyn Orazalın. Investorlardy tartý jáne óńirdiń ınvestıtsııalyq ahýalyn jaqsartý jónindegi óńirlik keńestiń kezekti otyrysy kezinde Astana halyqaralyq qarjy ortalyǵy basqarmasy tóraǵasynyń keńesshisi Bolatbek Qýandyqov ınvestorlarǵa qarjy naryǵynyń qoldanystaǵy quraldaryn tanystyrdy.
