Aqtóbede taǵy bir adam koronavırýs ınfektsııasynan aıyqty
AQTÓBE. QazAqparat – Aqtóbede taǵy bir adam dertinen aıyǵyp shyqty. Ol Aqtaý arqyly Túrkııadan kelgen bolatyn, dep habarlaıdy QazAqparat tilshisi.
Aqtóbe oblysy boıynsha barlyǵy 11 adamnan koronavırýs ınfektsııasy anyqtalǵan bolatyn. Onyń bireýi ótken aptada aýrýhanadan shyqty. Búgin taǵy bir naýqas dertinen aıyqty.
«Túrkııadan kelgen qala turǵynynan sońǵy eki táýlikte eki ret analız alynyp, vırýs anyqtalmady. Búgin 16 táýlik boldy. Em nátıje berdi. Shaǵym joq, dene qyzýy qalypty. Ári qaraı ambýlatorlyq baqylaýda, úıdegi karantınde bolady. Dárigerler áli eki apta baqylaýdy jalǵastyrady. Qazir 9 naýqas em qabyldap jatyr. Onyń ekeýiniń jaǵdaıy ortasha aýyr, ózgesiniń densaýlyǵy qanaǵattanarlyq», - dedi oblystyq densaýlyq saqtaý basqarmasynyń basshysy Áset Qalıev.
Óńirde ınfektsııalyq, prozızorlyq jáne karantındik gospıtalde 270 turǵyn oqshaýlanǵan. Onyń 40-y ınfektsııalyq gospıtalde jatyr.
Aıta keteıik, úıdegi karantınde 1800-den astam adam bar. Olardyń barlyǵy ekspress test Aqtóbege jetkizilgende tekseriledi.
«Qujat rásimdeý kezinde kedergiler bolyp, ekspress test Qorǵas shekara beketinde qalyp qoıdy. Birer kúnde jetkizilip, aldymen úıdegi karantınde jatqan adamdardan synama alynady. Eger vırýs belgisi anyqtalmasa, tizimnen syzylady. Al eger nátıjesi kúdik týǵyzsa, zerthanalyq tekserýge jiberiledi. Bizde ulttyq saraptama ortalyǵy men obaǵa qarsy stantsııada laboratorııa bar. Infektsııalyq aýrýhanadaǵy zerthana jóndelip, taıaýda iske qosylady. Barlyǵy táýligine 400 adamnan alynǵan synamany zertteýge múmkindik beredi», - dedi Áset Qalıev.
