Aqtóbede taǵy 8 mektepke jarylǵysh zat qoıylǵany týraly habarlama tústi
Aqtóbe qalasyndaǵy № 2, 14, 31, 25, 9, 35, 34, 17 mektepterge jarylǵysh zat qoıylǵany týraly aqparat túsip, túske deıin oqıtyn balalardyń barlyǵy evakýatsııalandy. Oblystyq PD baspasóz qyzmetiniń habarlaýynsha, habarlama ІІM-niń elektrondy poshtasynan túsken.
«Polıtsııa departamenti anonımdi habarlamanyń avtoryn anyqtaý jáne kúdiktini ustaý úshin jedel sharany qolǵa aldy. Atalǵan fakti boıynsha Qylmystyq kodekstiń «Terrorızm aktisi týraly kórineý jalǵan habarlaý» baby boıynsha sotqa deıingi tergeý bastaldy. Aqtóbe oblysynyń Polıtsııa departamenti terrorızm aktisi týraly kórineý jalǵan habarlaý qylmystyq quqyq buzýshylyq bolyp tabylatynyn jáne QR QK 273-babynda kózdelgen qylmystyq jaýaptylyqqa ákep soǵatynyn eske salady», - dedi oblystyq PD baspasóz qyzmetiniń jetekshisi Erbolat Sarqulov.
Eske salsaq, dál osyndaı oqıǵa 20-qyrkúıek kúni boldy. Ol kezde Nazarbaev zııatkerlik mektebi, № 2, 14 jáne 31 orta mektepterinde jarylǵysh zat bar degen habarlama tústi. Mektepterdi jappaı «bombalaý» byltyr bastaldy. Áli kúnge deıin kúdikti anyqtalmady.
