Aqtóbede taǵy da kólikke tehnıkalyq qyzmet kórsetý ortalyǵy órtendi
AQTÓBE. KAZINFORM – Aqtóbe qalasyndaǵy taǵy da kólikke tehnıkalyq qyzmet kórsetý ortalyǵy órtendi. Onyń ishinde eki kólik janyp ketti.
Aqtóbe oblystyq TJD-niń habarlaýynsha, habarlama saǵat 18:15-te tústi. Tilsiz jaý arada 30 mınýt ótkende sóndirildi. Órt sóndirýshiler jalyn ishinen ottegi ballonyn alyp shyqqan.
- Oqıǵa ornyna 45 qyzmetker men 9 tehnıka jetti. Eki qabatty ǵımarattyń birinshi qabatyndaǵy tehnıkalyq qyzmet kórsetý ortalyǵy jandy. Aýdany – 100 sharshy metr. Órt kezinde 2 kólik órtenip ketti, - dedi Aqtóbe qalasy TJB ınjeneri Álı Kýpenov.
Ázirge órt kezindegi qatty dybystyń neden shyqqany belgisiz. Qazirgi kezde ottyń neden tutanǵany anyqtalyp jatyr.
Eske salsaq, keshe ǵana Aqtóbe qalasyndaǵy avtobazarda ornalasqan kólikke tehnıkalyq qyzmet kórsetý stansasy órtendi. Іshinde eki kólik janyp ketti.