Aqtóbede taǵy da qoqys polıgony órtendi
AQTÓBE. KAZINFORM - Órt aýmaǵy 1 myń sharshy metrge jetti. Keshe bastalǵan órt búgin tańda ǵana tolyq sóndirildi.
Turmystyq qatty qaldyq polıgony jylyna birneshe ret órtenip tur. Eskisi tolyq jabylyp, jańasy ashylǵanymen problema sol kúıi sheshimin tappady.
— Aqtóbe qalasynan 10 shaqyrym qashyqtyqta ornalasqan qatty turmystyq qaldyqtar polıgonynda qoqys jandy. Aldyn ala málimet boıynsha janý aýmaǵy shamamen 1 000 sharshy metrdi qurady. Órtti sóndirý jumystaryna Aqtóbe oblysynyń tótenshe jaǵdaılar departamenti, apattar medıtsınasy ortalyǵy, «Qyzmet Aqtóbe» JShS, sondaı-aq jergilikti atqarýshy organ qyzmetkerleri jumyldyryldy. Órt keshe keshki ýaqytta oqshaýlanyp, tańerteńgi ýaqytta tolyqtaı joıyldy. Tilsiz jaýdyń taralýynyń aldyn alý maqsatynda shamamen 600 sharshy metr aýmaq ınertti materıalmen jabyldy. Zardap shekkender joq, - dep habarlady oblystyq TJD baspasóz qyzmeti.
Eske salsaq, qyrkúıek aıynda Aqtóbe qalasynda qoqys polıgonynan órt shyqty. Órt eki táýlikten soń tolyq sóndirildi.