Aqtóbede taǵy bir psıhonevrologııalyq ortalyq ashylady
AQTÓBE. KAZINFORM – Óńirde psıhonevrologııalyq dertke shaldyqqan 200-den astam adamdy ortalyqqa ornalastyrý qajet. Kezek kóbeıgen soń Áıteke bı aýdany Qarabutaq aýylyndaǵy burynǵy aýrýhana ǵımaraty tańdaldy.
Aqtóbe oblystyq jumyspen qamtýdy úılestirý jáne áleýmettik baǵdarlamalar basqarmasynyń basshy Lázzat Orazbaevanyń aıtýynsha, psıhonevrologııalyq ortalyq ashý kezinde birneshe ǵımaratqa taldaý júrgizilgen. Eń tıimdisi – Qarabutaqtaǵy burynǵy aýrýhana ǵımaraty. Bul nysan shamamen 9 jyldan beri bos tur.
– Ǵımarat úlken. Qazirgi kezde aǵymdaǵy jóndeý jumysyn júrgizýge qarjy bólindi. Al «Samuryq-Qazyna» AQ-y jıhazben jabdyqtaýǵa kómek kórsetedi. Aqtóbe oblysyndy psıhonevrologııalyq dertke shaldyqqan 6 myńǵa jýyq adam tirkeýde tur. Onyń 200-den astamy ortalyqqa ornalastyrý kezegine alynǵan. Al ınternat sany bireý ǵana. Onda da oryn bosamaıdy. Tek adamdar qaıtys bolǵan kezde ǵana qabyldaýǵa múmkindik bar. Osy máseleni kótergenimizge bir jyldan astam ýaqyt bolyp qaldy. Sheshimi tabylyp tur. Áıteke bı aýdanynan ashylsa, kezek azaıady. Ári oblys ortalyǵynda bos turǵan úlken ǵımarat tabylmady, - Aqtóbe oblystyq jumyspen qamtýdy úılestirý jáne áleýmettik baǵdarlamalar basqarmasynyń basshy Lázzat Orazbaeva.
Jospar boıynsha 150 orynǵa arnalǵan ortalyq ashylady. Mekemede táýlik boıy medıtsınalyq baqylaý uıymdastyrylyp, psıhıatrııalyq jáne psıhoterapııalyq kómek kórsetiledi.
– Joba iske asqan jaǵdaıda erekshe qajettiligi bar azamattarǵa qolaıly jaǵdaı jasalyp, olardyń ómir sapasyn jaqsartýǵa múmkindik týady. Bul bastama otbasylarǵa túsetin áleýmettik júktemeni azaıtyp, turaqty ári sapaly kútimmen qamtamasyz etýge jol ashady. Dári-dármekpen qamtamasyz etý, áleýmettik-turmystyq qyzmetter kórsetý, psıhologııalyq qoldaý jáne eńbekke beıimdeý baǵytyndaǵy jumystar júrgiziledi. Bos ýaqytty tıimdi uıymdastyrýǵa arnalǵan mádenı-saýyqtyrý sharalary da qarastyrylady. Ortalyq erekshe qajettiligi bar azamattardy qoldaýdy kúsheıtip, jergilikti turǵyndar úshin jańa jumys oryndaryn ashýǵa múmkindik beredi, - dep habarlady basqarma.
Eske salsaq, Aqtóbe qalasy shetindegi № 2 áleýmettik qyzmet kórsetý ortalyǵy 1988 jyly ashylyp, jumys istep tur. Byltyr bul jerde 400-den astam turǵyn boldy. Bári de júıke aýrýyna shaldyqqan, keıbiri múgedektigi bar adamdar. Munda 18 jastan asqan eresekter qabyldanady.