Aqtóbede taǵy bir aýyldyń halqy evakýatsııalanyp jatyr
AQTÓBE. KAZINFORM — Yrǵyz aýdanynda Quılys aýylynyń turǵyndaryn evakýatsııalaý jumysy bastaldy. Munda 500-den astam adam turady.
Yrǵyz aýdanynda buǵan deıin Nura, Mamyr jáne Belsher aýyldarynan 900-ge jýyq adam evakýatsııalandy.
Qazirgi kezde Mamyr men Nura aýyldaryna sý kirgeni belgili.
Endi tótenshe jaǵdaılar qyzmeti, jergilikti atqarýshy organ ókilderi men eriktiler Quılys jáne Jaısańbaı aýyldaryn sýdan qorǵaý úshin jaǵalaýdy bekitip, qum toly qap tósep jatyr.
— Nura aýyldyq okrýgi boıynsha 34 úıge, 5 ǵımaratqa sý kirdi. Mamyr aýylynda 10 úıge sý kirdi. Munda eki úı qulady. Qazir Táýip aýyldynda turǵyndardy kóshirý jumysy júrip jatyr. Onda 500-den astam adam tursa, onyń jartysy áıelder men bala-shaǵa. Aldymen solardy, sonymen birge zeınetkerlerdi kóshiremiz, — dedi Yrǵyz aýdanynyń ákimi Nurlan Qyzbergenov.
Táýip aýyl okrýginiń ákimi Kamal Tileýjanovtyń aıtýynsha, qazir aýylda 7 tehnıka bar.
Bul kólikterdiń bári jaǵalaýdy qummen bekitý, bıiktetý jumystaryn júrgizýge jumyldyrylǵan.
— Aýylda 541 adam turady. Olardyń bir tobyn tikushaqpen aýdan ortalyǵyna jiberdik. Áıelder men balalar ǵana kóshiriledi, al er adamdar qalady. Jyldam kóshirý úshin tikushaq qoldanylyp jatyr. Qazir bizdiń aýyldyń jan-jaǵynda sý bar. Qaıyqpen, jol talǵamaıtyn kólikpen ótýge bolady. Biraq tikushaq tez evakýatsııalaýǵa múmkindik beredi. Negizi bizge Yrǵyz ózeniniń sýy keldi. Qazir Torǵaı ózeniniń sýyna daıyndyq jasap jatyrmyz. Biz Yrǵyz ózeninen sý keletin sońǵy núkteniń birimiz. Bizden keıin Jaısańbaı aýyly bar, — dedi Táýip aýyldyń okrýginiń ákimi Kamal Tileýjanov.
Aıta keteıik, búginge deıin aýyldardan 887 adam evakýatsııalandy. Onyń 357-i evakýatsııalyq pýnktke ornalasty.
