Aqtóbede tabıǵı monopolııalardy retteý departamentiniń basshysy sot aldynda jaýap beredi
AQTÓBE. QazAqparat - Aqtóbe oblystyq tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamentiniń basshysy Gúlnur Masına men onyń orynbasary Nurlan Bolatbaevqa qatysty qylmystyq is qozǵaldy, dep habarlaıdy QazAqparat tilshisi.
Aqtóbe oblystyq tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamentiniń basshysy Gúlnur Masına men onyń orynbasary Nurlan Bolatbaevqa alǵashynda Qylmystyq kodekstiń «Laýazymdyq ókilettilikterdi teris paıdalaný» baby boıynsha aıyp taǵylyp, tergeý júrdi. Keıin prokýror «Salǵyrttyq» babymen qaıta qarap, aıyptaý qorytyndysyn daıyndady. Qazirgi ýaqytta aıyptalýshylar ispen tanysyp jatyr.
«2017 jyldyń 28 - qyrkúıegi men 17 - qarashasy aralyǵynda departamenttiń basshysy Gúlnur Masına men onyń orynbasary Nurlan Bolatbaev óz isine salǵyrt qarap, memleket qorǵaýyndaǵy azamattar men mekemelerge shyǵyn keltirdi. Atap aıtar bolsaq, «Aqtóbe jylý-elektr ortalyǵy» AQ-na 214 mıllıon 866 myń teńge, «Transenergo» AQ-na 428 mıllıon 135 myń teńge iri kólemde shyǵyn keldi», - dep habarlady oblystyq sottyń baspasóz qyzmeti.
Sot otyrysy 8 mamyrǵa qaldyryldy.
