Aqtóbede tabaqqa tartýǵa daıyn et satylady
AQTÓBE. QazAqparat - Aqtóbeniń Shalqar aýdanynda qazaqtyń salt-dástúrine negizdelip, syıly qonaqqa asylatyn et toptamasy shyǵarylyp jatyr. Bul - elimizde alǵash ret qolǵa alynǵan joba. Jańa kombınattyń jumysymen óńir basshysy Berdibek Saparbaev tanysty, dep habarlaıdy QazAqparat tilshisi oblys ákiminiń baspasóz qyzmetimen silteme jasap.
Aqtóbe oblysynyń ákimi Berdibek Saparbaev issaparmen Shalqar aýdanyna bardy. Sonymen qatar, Aqtóbe oblysynyń prokýrory Marat Kaıbjanov, oblystyq sottyń tóraǵasy Muratǵalı Áketaı jáne memlekettik mekeme basshylary aýdan, aýyl halqymen kezdesti. Qazirgi ýaqytta aýdanda «Shalqar eti» et óńdeý kombınaty jumys istep tur. Baıqadam aýylyndaǵy «Nuraly» sharýa qojalyǵyna tıesili kombınattyń óz ereksheligi bar. Munda ata-dástúrmen ár syıly qonaqqa arnalǵan et bólshektelip satylady.
«Elimizde alǵash ret ár adamǵa arnalǵan sybaǵany shyǵaryp jatyrmyz. Et asqan kezde adamdar kimge qandaı múshe tartý etemiz, qansha adamǵa et jetedi dep oılanbaıdy. Biz shyǵarǵan qoraptyń ishinde arnaıy sybaǵa bar. Onyń kimderge arnalǵany korabynda jazýly tur. Qazir adamdar tabaq tartýdyń joldaryn umytyp barady. Sondyqtan jańa ónimdi ata-dástúrdi jańǵyrtyp, yńǵaıly etip shyǵardyq. Suranysqa ıe bolady degen senim bar», - dedi et kombınatynyń jetekshisi Berdibek Shákiruly.
Aıta keteıik, munda jylyna 1800 tonna et ónimi shyǵarylady. Sharýashylyqta 600 bas iri qara mal bar. Sonymen qatar, qazy, tushpara, tartylǵan et te arnaıy qorapqa salynǵan. Jańa kombınat jumysymen tanysqan óńir basshysy Berdibek Saparbaev tek Shalqar aýdanynyń ǵana emes, ózge óńirdiń sharýalarymen birlese jumys istep, et óńdeý kólemin arttyrýdy tapsyrdy.
«Mal basyn arttyrý kerek. Ókinishke qaraı, ótken jyly Shalqar aýdanynda mal basy azaıyp ketken. «Sybaǵa», «Qulan» baǵdarlamalary da tolyq oryndalmady. Sondyqtan birlese jumys istep, ata kásipti damytý kerek»,- dedi oblys ákimi Berdibek Saparbaev.
