Aqtóbede T-Gaz gaz quıý beketinde órtengen kóliktiń shyǵynyn operator óteıdi
AQTÓBE. KAZINFORM — Sot sottalýshy Rýstam Kelbetovti Qylmystyq kodekstiń «Bótenniń múlkin abaısyzda joıý nemese búldirý» babymen kináli dep tanydy. Sottalýshy kólik shyǵynyna eseptelgen 23,5 mln teńgeni 15 táýlik ishinde tóleýge tıis.
Aqtóbe qalalyq № 2 sotynda T-Gaz gaz quıý beketinde bolǵan órtke qatysty is qaraldy. Gaz quıý beketiniń operatory Rýstam Kelbetovke Qylmystyq kodekstiń «Bótenniń múlkin abaısyzda joıý nemese búldirý» baby boıynsha aıyp taǵylyp, úkim shyqty.
— Rýstam Kelbetov Qylmystyq kodekstiń 204-baby 2-bóligimen kózdelgen qylmystyq quqyq buzýshylyqty jasaǵany úshin kináli dep tanylsyn. Oǵan 1 jyl merzimge bas bostandyǵynan shekteý jazasy taǵaıyndalsyn. «Raqymshylyq jasaý týraly» Zańy negizinde bas bostandyǵynan shekteý túrindegi negizgi jazadan bosatylsyn. Jábirlenýshiniń azamattyq talap aryzy tolyq qanaǵattandyrylsyn, 23,5 mln teńge materıaldyq shyǵyn, 850 myń teńge ókil shyǵyny óndirilsin, — dedi sýdıa Damır Pangereı. Sonymen birge sot mundaı órt oqıǵalarynyń aldyn alý úshin Aqtóbe oblystyq TJD-niń bastyǵyna jekeshe qaýly shyǵardy.
Sottalýshy Rýstam Kelbetov sońǵy sózinde tek ózin emes, T-Gaz gaz quıý beketiniń ıesin de jaýapqa tartýdy surady ári jábirlenýshiniń shyǵynyn óteıtin aqshasy joq ekenin aıtty.
Sot úkimi zańdy kúshine engen joq.
Eske salaıyq, órt byltyr shilde aıynda boldy. Kólik órtengen kezde jumysshyny kúıik shalyp, ol aýrýhanada em qabyldady. Budan ózge Aqtóbede úsh adamnyń ómirin qıǵan órt oqıǵasyna qatysty da sot otyrysy bastaldy. Onda avtogaz quıý beketiniń ıesine aıyp taǵylyp jatyr.
