Aqtóbede T-Gaz gaz quıý beketinde kólik órtenip ketti
AQTÓBE. KAZINFORM - Gaz quıý beketiniń operatoryn kúıik shalyp, aýrýhanaǵa tústi.
Oqıǵa Aqtóbe qalasy Astana aýdany Edige batyr dańǵyly boıynda ornalasqan avtogaz quıý stantsııasynda boldy.
Oblystyq TJD baspasóz qyzmetiniń habarlaýynsha, 25 lıtrlik turmystyq gaz ballonyn toltyrý kezinde jeńil avtokólik órtendi. Órt kezinde gaz ballony jarylmady.
- Órt sóndirýshilerdiń jedel áreketiniń arqasynda órt tolyq sóndirildi. Órt rezervýar men ınfraqurylymǵa taralmady. Oqıǵa saldarynan avtogaz quıý beketiniń operatoryn kúıik shaldy. Zardap shekken jumysshyǵa shuǵyl medıtsınalyq kómek kórsetý úshin ol dereý medıtsınalyq mekemege jetkizildi,- dep habarlaıdy TJD baspasóz qyzmeti.
Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, naýqas travmatologııa bólimine jetkizildi. Qazir jaǵdaıy turaqty, naýqas esin biledi.
Eske salsaq, jumada Astanada úsh qabatty bazar ǵımaraty órtke orandy. Oqys oqıǵa Astana qalasy Baıqońyr aýdany Alash tas jolynyń boıyndaǵy bazarlardyń birinde boldy.