Aqtóbede sybaılas jemqorlyqqa qatysty qylmystyq is kóbeıdi
Sybaılas jemqorlyqqa qarsy is-qımyl departamentiniń basshysy Baýyrjan Balǵabekov jyl basynan beri atqarylǵan is týraly aıtyp berdi. Atalmysh departament 79 qylmystyq isti tirkese, onyń 61-i sybaılas jemqorlyqqa qatysty.
Tergeý kezinde aýyr jáne asa aýyr isterdi anyqtaýǵa basymdyq berilgen. Byltyrǵy jylmen salystyrǵanda kórsetkish 33-ten 56-ǵa deıin ósken. Tirkelgen istiń 27-si bıýdjet qarajatyn jymqyrý jáne 29-y para alý faktisi.
B.Balǵabekovtiń aıtýynsha, ótken jylmen salystyrǵanda qylmystyq jaýapqa tartylǵan adamdardyń sany da ósken. Máselen, byltyr olardyń sany 31 bolsa, bıyl kórsetkish 43-ke jetti. Bıyl 8 aıda shaǵyn jáne orta bıznes qyzmetine zańsyz aralasý faktisi de tirkeldi. Olardyń jalpy sany - 4 derek. Memlekettik baǵdarlamalardy iske asyrý kezinde jiberilgen qatelik te anyqtaldy. Bul baǵytta 14 qylmys ashyldy. Al quqyq qorǵaý organdary men Qorǵanys mınıstrligi arqyly 26 qylmys tirkeldi.
«Departament kóleńkeli bıznesti qoldaǵandardy da anyqtady. Bul baǵytta 22 qylmystyq is tirkeldi. Jalpy jyl basynan 36 qylmystyq is sotqa joldandy. Keltirilgen zııan 600,7 mln teńge. Onyń 561,1 mln teńgesi bıýdjetke qaıtaryldy. Ótemaqynyń úlesi 92% qurady», - dedi departament basshysy Baýyrjan Balǵabekov.
Baspasóz máslıhaty barysynda departament basshysy Memleket basshysy saıasatynyń negizgi baǵyttarynyń birine toqtaldy.
«Sybaılas jemqorlyqqa qarsy reformalar toptamasy naqty zańdarda kórinis tapty jáne tıimdi aldyn alý quraldary retinde ózin dáleldedi. Bul rette basshy jaýapqa tartylǵan memlekettik qyzmetkeri úshin de jazalanady. ıAǵnı, otstavka ınstıtýty qarastyrylǵan», - dedi B.Balǵabekov.