Aqtóbede sybaılas jemqorlyq týraly habar beretin adamdar kóbeıdi
AQTÓBE. QazAqparat - Aqtóbede sybaılas jemqorlyq týraly aqparat aıtyp, senim telefonyna habar beretin adam kóbeıdi. Bıyl olarǵa 1,3 mıllıon teńge yntalandyrý qarjysy berildi, dep habarlaıdy QazAqparat tilshisi.
Aqtóbede «Jemqorlyqsyz bolashaqqa. Birge!» atty oblystyq sybaılas jemqorlyqqa qarsy kúres forýmy ótti. Forým kezinde arnaıy kórme uıymastyrylyp, beınerolık kórsetildi. Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti taratqan málimetke súıensek, jyl ishinde Aqtóbede 69 sybaılas jemqorlyq deregi anyqtaldy. Paraqorlyq, qyzmettik ókilettilikti teris paıdalaný faktisi basym. Jemqorlyqtyń aldyn alý úshin óńirde 1 mıllıonnan astam jarnama taratyldy.
«Jyl basynan beri 15 reıd júrgizildi. Qyzmetten tys ýaqytta avtokólikti paıdalanýdyń 24 faktisi anyqtaldy. Memlekettik qyzmetkerler jaýapkershilikke tartyldy. «Qyzmettik kólik - qyzmettik maqsatta» aktsııasy uıymdastyryldy. Qazir barlyq mekemelerdiń kólikterinde arnaıy japsyrma bar»,- dedi Memlekettik qyzmet isteri áne sybaılas jemqorlyqqa qarsy is-qımyl agenttiginiń oblystyq departamentiniń basshysy Qaıyrjan Toqyshev. Sonymen qatar, bıyl call ortalyqqa 10 adam habarlasyp, jemqorlyq týraly aqparat berdi. Naqty aqparat bergen adamdarǵa 1,3 mıllıon teńge bólindi.
«Jemqorlyqpen kúresý - qoǵamnyń jáne ár azamattyń ortaq isi, ortaq mindeti. Adam belgili bir materıaldyq jaǵdaıǵa táýeldi bolsa, ol ar-namysty, uıatty ekinshi orynǵa qoıady. Eger biz osylaısha ar-namysty ekinshi orynǵa qoısaq, onda bolashaqta tutas bir urpaqty joǵaltyp alýymyz múmkin. Biz osyny túsinýimiz kerek. Jemqorlyqqa qarsy kúres jumystaryn júrgizip, óńirimizdi odan ári jaqsartyp, adamgershilik, rýhanı baılyǵymyzdy joǵaltpaýymyz qajet»,- dedi Aqtóbe oblysy ákiniń orynbasary Erbol Nurǵalıev.
Forým kezinde naqty usynystar da aıtyldy. Máselen, Aqtóbe oblystyq máslıhatynyń depýtaty Amangeldi Esirkepov orta, joǵary oqý oryndaryn jas urpaqty tárbıeleý alańyna aınaldyrýdy usyndy. Tipti, arnaıy pán engizilip, dáris berý qajet dep esepteıdi. 
