Aqtóbede suıytylǵan gazdy shetel asyrmaq bolǵandardyń alǵashqysy tutqyndaldy
AQTÓBE. QazAqparat - Aqtóbe suıytylǵan gazdy shekara asyrmaq bolǵandardyń alǵashqysyna búgin tutqyndaý túrindegi bultartpaý sharasyna sanktsııa berildi. Gaz tapshylyǵy máselesi boıynsha aldymen «GoldStep» seriktestiginiń dırektory Berik Esenov ustaldy, dep habarlaıdy QazAqparat tilshisi.
Eki apta buryn Aqtóbe qalasyndaǵy qaladaǵy gaz quıý beketterinde gaz tapshylyǵy tirkelip, másele Úkimetke jetken bolatyn. Al búgin sol iske qatysy bar degen kúdikpen «GoldStep» seriktestiginiń dırektory Berik Esenov ustaldy. Eki balanyń ákesi buryn sottalmaǵan, isti bolmaǵan. Sot otyrysyna ol aýrýhanadan jetkizildi. Sozylmaly baýyr aýrýyna shaldyqqan kúdikti budan ári tergeý ızolıatorynda jata almaıtynyn aıtyp, kepilge 4 mıllıon teńge salýǵa múmkindigi bar ekenin jetkizdi. Al memlekettik aıyptaýshy Gúlnar Artyqova qamaý túrindegi bultartpaý sharasyn sanktsııalaýdy surady. Sebebi, ishki naryqqa arnalǵan gaz Reseı men Aýǵanstanǵa jiberilmek bolǵan.
«Gold Step» seriktestiginiń dırektory Berik Esenov sybaılastary «Gaz Impeks» seriktestigimen birge ishki naryqqa arnalǵan gazdy shetel asyrmaq bolǵan. Atap aıtar bolsaq, osy jyldyń 14-shi aqpany kúni «Gaz Impeks» seriktestigi «Parasat LTD» kompanııasymen kelisim shartqa otyrady. Jylyna 15 myń tonna gazdy Aýǵanstan eline jetkizbek bolǵan. Ár tonnasy - 315 dollar. Sonymen qatar, 10 aqpan kúni «GazImpeks» seriktestiginiń dırektory Baıbekova Reseıdiń «Aman» kompanııasymen kelisim shartqa qol qoıady. Propan-býtan gazynyń 1 myń tonnasyn satyp alýǵa kelisken. Jalpy somasy 23 mıllıon 500 myń rýbl bolady»,- dedi memlekettik aıyptaýshy Gúlnar Artyqova.
Gaz shekara asyp úlgermedi. Oblystyq memlekettik kirister departamenti suıytylǵan gaz quıylǵan tsısternany Jińishke stantsııasynan anyqtaıdy. Suıytylǵan otyndy «GazImpeks» kompanııasy Aýǵanstanǵa jibermek bolǵan. Sonymen qatar, №2 Aqtóbe stantsııasynda gaz jelilik uıymy taǵy 6 tsısterna gazdy «AzGazLogıstık» seriktestiginiń aýmaǵyna jetkizip qoıady. Keıin temirjol arqyly «Pozıtıv» seriktestigine jetkizilgen. Reseıge shekara asyrýǵa jalǵan qujattary jınaqtalǵan. Bul derekti estigen kúdikti aıyptaý qorytyndysymen kelispedi
«Men memlekettik aıyptaýshy aıtyp turǵan adamdardy tanymaımyn, tipti birinshi ret estip turmyn. Men buryn sottalmadym, zań buzǵan emespin. Bul jerde maǵan taǵylǵan aıypty negizsiz dep oılaımyn. Alǵashqy kúnnen bastap tergeýge qatysyp, jan-jaqty kómek beremin dep aıta alamyn. Óz túsiniktememde suıytylǵan gazdy satýmen aınalysatyn qyzmetkerdi aıttym. Olardan jaýap alynbady. Tek meni tutqyndady. Men qoǵamǵa eshqandaı qaýip tóndirmeımin, qashpaımyn. Meni kepilmen bostandyqqa shyǵarýdy suraımyn. Kámelet jasqa tolmaǵan eki balam bar. Densaýlyǵym tergeý qapasynda otyrýǵa jaramaıdy»,- dedi kúdikti Berik Esenov.
Kúdiktige Qylmystyq kodekstiń «Ekonomıkalyq kontrabanda» baby boıynsha aıyp taǵylyp otyr. Sýdıa Ádilova Berik Esenovtyń ýájderin negizsiz dep taýyp, 2 aıǵa qamaý túrindegi bultartpaý sharasyna sanktsııa berdi. Onyń kinási tolyq dáleldense, 3 jyldan 7 jylǵa deıin bas bostandyǵynan aıyrylýy múmkin.
