Aqtóbede suıytylǵan gaz tapshylyǵynyń neden týyndaǵany anyqtaldy
Júrgizýshiler keshe keshkilik, búgin gaz kezeginde turdy. Buǵan qordyń taýsylýy, Pavlodardaǵy gaz óńdeý zaýytynyń jóndeýge baılanysty toqtaýy sebep bolyp otyr.
«Aı saıyn suranysty arttyryp otyrmyz. Sol kezde bizde qor saqtalyp, gaz tapshylyǵy týyndaǵan joq. Bul joly Pavlodar gaz óńdeý zaýyty jóndeýge toqtatyldy. Al «SNPS-Aqtóbemunaıgaz» AQ-na qazaqstandyq suranysty qamtý mindeti júkteldi. Aqtóbelik gaz óńdeý zaýyty bizdiń qosymsha suranysymyzdy tolyq qamtı almaı qaldy ári sońǵy ýaqytta gazben júretin kólikterdiń sany artty», - dedi Aqtóbe oblystyq kásipkerlik basqarmasynyń bólim basshysy Maııa Bımenova.
Gaz óndirýshiler men suranys berýshiler qajetti suıytylǵan otynnyń kólemin tirkeýde turǵan avtokólikterdiń sanymen ólsheıdi. Keıbir júrgizýshiler kóligin benzınnen gazǵa aýystyrǵanymen, áli kúnge deıin jol polıtsııasyna tirkeýge turmaǵan. Aıta keteıik, Aqtóbe oblysy qarasha aıynda 8200 tonna gazǵa suranys berse, jeltoqsanda 9 myń tonnaǵa tapsyrys berildi. Ár kún saıyn aqtóbelikter 300 tonna suıytylǵan gaz tutynady. Aqtóbe oblystyq kásipkerlik basqarmasynyń málimetine súıensek, tapshylyqty joıý úshin 270 tonna gaz jetkizilip jatyr.
