Aqtóbede suıytylǵan gaz satatyn 14 sýbekti baǵany birlesip kótergen
AQTÓBE. QazAqparat - Aqtóbe oblystyq tabıǵı monopolııalardy retteý jáne básekelestikti qorǵaý departamenti jaz boıy júrgizýshilerdi kezek kútýge májbúrlegen 16 suıytylǵan gaz taratý sýbektisin tekserdi. Tekserý kezinde 14 sýbektiniń baǵany birlese kótergeni, naryqtaǵy básekelestik týraly talapty saqtamaǵany anyqtaldy. Gaz taratýshylarǵa 7 mıllıon teńgeden astam aıyppul salyndy, dep habarlaıdy QazAqparat tilshisi.
Aqtóbe oblysynda jaz boıy suıytylǵan gaz tapshy bolyp, keıin baǵa birden eki esege qymbattady. Kúdik týdyrǵan soń Aqtóbe oblystyq tabıǵı monopolııalardy retteý jáne básekelestikti qorǵaý departamenti tekserý júrgizdi.
«Suıytylǵan gazdy bólshekter satý naryǵyndaǵy 16 sýbektige tekserý júrgizildi. Olardyń arasynda «As Gaz Logıstıka», «Ómir-Gaz», «Temir sapa Aqtóbe», «Kepil Sapa A», «Muǵaljar Gaz» sekildi iri seriktestikter bar. Nátıjesinde gaz qoıý beketterindegi baǵa ózara kelisimmen kóterilgeni anyqtaldy. Іs sotqa jiberilip, Aqtóbe qalasynyń mamandandyrylǵan ákimshilik soty 14 sýbektini aıypty dep tanyp, 7,6 mıllıon teńge aıyppul saldy. Sonymen qatar, 21 mıllıon teńge monopolııalyq kiris tárkilendi»,- dedi Aqtóbe oblystyq tabıǵı monopolııalardy retteý jáne básekelestikti qorǵaý departamenti jetekshisiniń orynbasary Saǵyndyq Irgaleev.
Sot qaýlysy zańdy kúshine engen joq. Sonymen qatar, taǵy eki mekemege qatysty ákimshilik is sotta qaralyp jatyr. Gazdyń bólshek saýdasymen aınalysatyn kompanııalar jazda baǵany 44-45 teńgege kóterse, jańa jyldan keıin suıytylǵan gazdyń bir lıtri 50-51 teńgege jetti.
