Aqtóbede suıytylǵan gaz baǵasy 10 teńgege arzandap ketti
AQTÓBE. QazAqparat - Aqtóbede suıytylǵan gazdyń lıtri 41-43 teńgeden satylyp jatyr. Óńirde qurylǵan arnaıy shtab gaz tapshylyǵy men baǵanyń qymbattaýyna baılanysty tekserý júrgizdi, dep habarlaıdy QazAqparat tilshisi.
Aqtóbede suıytylǵan gaz máselesin sheshý úshin oblys ákimi Berdibek Saparbaevtyń tapsyrmasymen arnaıy shtab quryldy. Shtab quramyna QR Energetıka mınıstrliginiń ókili men quqyq qorǵaý organdary, qoǵamdyq uıymdar, gaz taratý, satýmen aınalysatyn kásipkerler kirdi. Olar zaýyttan tutynýshyǵa deıingi aralyqty tekserip, keıbir taratýshy, jetkizýshi kompanııanyń baǵanyń ósýine áser etkenin anyqtady.
«Suıytylǵan gazdy taratý, jetkizý kezinde júıeli máselelerdi anyqtap, onyń sheshý joldaryn izdedik. Birneshe faktor tapshylyqqa, baǵanyń ósýine keri áserin tıgizgen. Máselen, qazirgi ýaqytta gaz taratýdyń normatıvtik-quqyqtyq aktilerin jetildirý kerek. Gaz tek arnaıy kompanııalar emes, gaz quıý beketterimen de zaýyttan alynýy tıis. Sol kezde deldaldar jumys istemeıdi. Ekinshiden, óńirde gazben júretin kólikter sany ótken jylmen salystyrǵanda 34 paıyzǵa artty. ıAǵnı, 195 myń kóliktiń 17 myńy gazben júredi», - dedi oblys ákiminiń orynbasary Qaırat Bekenov.
Shtab tekserý jumystarynan soń ákimshilik kedergilerdi joıý, aı saıyn bólinetin kvota kólemin 7 200 tonnaǵa jetkizý qajet degen sheshim shyǵardy. Qazirgi ýaqytta Aqtóbege táýligine 350 tonna gaz jetkizilip jatyr. Energetıka mınıstrligi óńirge bólinetin gaz kólemin taǵy 2 myń tonnaǵa ósirdi.
Aıta keteıik, óńirde suıytylǵan gazdy kontrabandalyq jolmen shetel asyrmaq bolǵandar anyqtalyp jatyr. Qazirgi ýaqytta «GoldStep» JShS dırektory Berik Esenov tergeý qapasynda otyr.
«Aýǵanstanǵa shyǵarylmaq bolǵan suıytylǵan gazdyń jalpy quny 21 mıllıon teńge. Qazirgi ýaqytta qosymsha tergeý-tekserý jumystary júrgizilip jatyr. Sot saraptamasy arqyly gazdyń qaı zaýyttan alynǵany anyqtalatyn bolady. Bul is boıynsha «AzGazLogıstık», «Gold Step» JShS-i tekserilip jatyr», - dedi oblystyq memlekettik kirister departamentiniń basqarma basshysy Artýr Haırýtdınov.
