Aqtóbede suıytylǵan gaz urlaǵan 26 adam sottaldy
AQTÓBE. KAZINFORM – Olardyń barlyǵy munaı kompanııasy men tasymaldaýdy uıymdastyratyn merdiger mekemeniń jumysshylary.
Muǵaljar aýdandyq sotynda Qylmystyq kodektiń «Urlyq» baby boıynsha is qaraldy. Qylmystyq jaýapqa tartylǵan 26 sottalýshynyń bári «SNPS-Aqtóbemunaıgaz» AQ-na qarasty gaz óńdeý zaýytynda, olardyń merdigeri «Sapfeırýs» JShS, «JelDorTransAqtóbe» JShS-de jumys isteıdi.
Іs materıalyna súıensek, 2023 jyly Jańajol munaı gaz óńdeý kesheniniń jumysshysy R.Samýratov suıytylǵan gazdy tıeý jáne tirkeý ınjener dıspetcheri, tseh sheberi jáne aǵa operatory, sonymen birge merdiger «Sapfeırýs» JShS-niń sheberi, «JelDorTransAqtóbe» JShS-niń stantsııa basshysy, kezekshisimen birge suıytylǵan gazdy urlaý týraly jospar qurady. Sottalýshy R.Samýratov temirjol qyzmetkerlerimen birge 2024 jyldyń tamyz aıynda 25 415 kg (25 tonna – red.) suıytylǵan gazdy zańsyz tasymaldaıdy. Urlyq dál osy jolmen birneshe aıǵa sozylyp, «SPNS-Aqtóbemunaıgaz» AQ-na 34 829 524 teńgege múliktik zalal keltirdi.
Sot otyrysynda sottalýshy R.Samýratov ózine taǵylǵan aıypty ishinara moıyndady. Ol tek 2025 jyldyń aqpan aıynda urlyq jasaǵanyn aıtty. Qylmystyq top tsısternalarǵa suıytylǵan gazdy asyra toltyryp otyrǵan. Sóıtip 60 280 keli suıytylǵan munaı gazy esepke alynbaǵan. Bul urlyq 2024 jyldyń tamyz aıy men 2025 jyldyń aqpan aıy aralyǵynda boldy. Bári de Jańajol munaı-gaz óńdeý kesheniniń jumysshylary jáne Munaı ónimderin satý jáne ótkizý basqarmasynyń qyzmetkeri, sonymen qatar «Sapfeıros» JShS jáne «JelDorTrans Aqtóbe» JShS-niń jumysshylary.
Sot úkimimen sottalýshy R.Samuratov Qylmystyq kodekstiń 188-baby 4-bóligi 3-tarmaǵy boıynsha kinəli dep tanylyp, túpkilikti 5 jyl 2 aı 12 kún merzimge bas bostandyǵynan aıyryldy. E. Balmaǵambetov, Q. Berenuly, S.Janmedetov, M. Mambetjanov, R. Shaýkarovqa 5 jyl merzimge bas bostandyǵynan aıyrý jazasy taǵaıyndaldy. Alaıda raqymshylyqqa ilikken E. Balmaǵambetovke 3 jyl 4 aı, Q.Berenulyna, S. Janmedetovke, M.Mambetjanov, R. Shaýkarovqa túpkilikti 4 jyl jaza kesildi.
D.Ábishev, N. Berenııaz, D. Qojahmetov, Sh. Baıbaraqov, J.Telimov, R. Meneshov, D. Omarov, A. Jaqsylyqov, A. Baımuhan, M. Bekbol, M. Moldashev, B. Shynbaev, M. Qosjanovqa raqymshylyq jasalyp, 4 jylǵa shartty jaza taǵaıyndaldy. Sottalýshy T.Qulmyrza, A.Nurymbet, A.Ǵalymov, Á.Temirǵalıev jáne N.Qýandyqqa raqymshylyq jasalyp, jazanyń bir bóligi qysqartyldy. Túpkilikti 2 jyl 9 aı 18 kún merzimge bas bostandyǵyn shekteý jazasy taǵaıyndaldy. Sottalýshy Q.Meńdiǵarın men A. Álıevke 1 jyl 6 aı merzimge bas bostandyǵyn shekteý jazasy taǵaıyndaldy.
Al bir sottalýshynyń páteri memleket paıdasyna tárkilendi. Sot úkimi zańdy kúshine engen joq.
Eske salsaq, Aqtóbede birneshe aı boıy suıytylǵan gaz tapshy boldy. Aqtóbe oblysynyń ákimi Ashat Shaharov keler jylǵa bólinetin kólem kóbeıetinin aıtty.