Aqtóbede suıytylǵan gaz nege tapshy

AQTÓBE. KAZINFORM – Mınıstrlik óńirde tirkelgen kólik sanyna qaraı gaz kólemin bólgenimen, tranzıttik suranys eskerilmedi. Aqtóbege aı saıyn 13 myń tonna bólinse, oǵan taǵy 3 myń tonna qosý kerek. 

QR Energetıka mınıstrligi Aqtóbege aı saıyn 13 myń tonnadan astam suıytylǵan gaz bólip otyr. Bul óńir suranysyn tolyq qamtýǵa jetpeıdi.

- Problema bar. Biz ony mınıstrlikke jetkizip, qosymsha gaz bólý qajet ekenin dáleldedik. Qyrkúıek aıynda zaýytta jóndeý jumystary júrgiziledi. Sol kezde tapshylyq baıqalady. Sonymen birge tranzıttik kólik sany eskerilmeı keldi. Gaz qondyrǵysy bar kólik sany salyq organdarynan alynady. Integratsııalanǵan qujattaǵy kólik sanyn mınıstrlikke jiberemiz, soǵan qaraı suıytylǵan gaz kólemi bólinedi. Aı saıyn 13 myń tonna qarastyrylady. Sonymen birge Aqtóbe halyqaralyq tasjol boıynda ornalasqan. Tranzıttik kólik kóp. Sony eskerip, keler jylǵa taǵy qosymsha gaz kólemin bólý týraly kelisim jasaldy. Sebebi bólingen gaz kóleminen taǵy 3 myń tonna qosý kerek. Mınıstrlik qajetti kólemdi bólse, bári jetkilikti bolady, - dedi Aqtóbe oblysynyń ákimi Ashat Shaharov.

Aıta keteıik, Aqtóbe qalasynda ǵana emes, aýdandarda suıytylǵan gaz tapshy. Keıbir gaz quıý beketteri tek talon arqyly qyzmet kórsetse, keıbirinde múlde joq.