Aqtóbede súıiktisin óltirgen jigit sotta keshirim surady
AQTÓBE. QazAqparat – Aqtóbe oblystyq mamandandyrylǵan aýdanaralyq sotynda súıiktisin óltirgen sottalýshy Baqyt Orynbasarov sońǵy sózin aıtyp, keshirim surady, dep habarlaıdy QazAqparat tilshisi.
Buǵan deıin habarlaǵanymyzdaı, Baqyt Orynbasarov súıiktisi Ásem Elbrýsovany óltirdi degen aıyp taǵylyp otyr. Olar 2018 jyly tanysyp, 2019 jyly otbasy qurýǵa kelisken. Tergeý nusqasy boıynsha, eki jas jaldamaly páterde kezdesip, 23 jastaǵy sottalýshy sol jerde 22 jastaǵy bolashaq jaryn óltirgen.
Búgin Aqtóbe oblystyq mamandandyrylǵan aýdanaralyq sotynda aıyptalýshy kóptiń aldynda keshirim surap, ádil jaza taǵaıyndaýdy kútetinin jetkizdi.
«Ata – anamnan, týma-týystarymnan keshirim suraımyn. Sottan zańdy jáne ádil sheshim qabyldaýyńyzdy suraımyn», - dedi B.Orynbasarov.
Al jábirlenýshi tarap oǵan neǵurlym qatań jaza berýdi surap otyr.
«Búgin biz sot sheshimin tyńdaýǵa kelgen edik. Sheshim erteń shyǵatyn boldy. Keshe jaryssóz ótti. Sottalýshynyń qorǵaýshysy Qylmystyq kodekstiń «Adam óltirý» babyn «Densaýlyqqa qasaqana aýyr zııan keltirý» babyna aýystyrýdy surap otyr. Ol óz kinásin tolyq moıyndamady», - dedi marqum Ásem Elbrýsovanyń anasy Aıgúl Birimjanova.
