Aqtóbede sý tasqyny kezinde zardap shekken úılerdi ıeleriniń buzyp alýyna ýaqyt berildi
AQTÓBE. KAZINFORM –Tasqyn kezinde buzylǵan úılerdiń ıesi múlikti óz qarjysyna esepten shyǵarýy tıis. Buzyp alýǵa da ýaqyt berildi.
Aqtóbe oblysy Yrǵyz aýdanynyń Nura aýyly byltyr túgel sýǵa ketip, úıleri jaramsyz bolyp qaldy. Aýyl ózge jerge kóshirilip, jańa úı salyndy. Endigi mindet úıdi esepten shyǵarý, jańasyna qujat rásimdeý. Turǵyndar bul jumystarǵa 50-100 myń teńge qajet dep otyr.
— «Jyljymaıtyn múlikke quqyqtardy memlekettik tirkeý týraly» Zańynyń 22 babyna sáıkes jańa úılerdiń qujatyn alý úshin tasqynynan zardap shekken eski úılerliń qujatyn tapsyrýy qajet. Jalpy aýdan boıynsha 161 turǵyn úı zardap shekti. Qazirgi ýaqytta 45 turǵyn úı ıesi eski úılerin esepten shyǵardy. Atalǵan qyzmet kórsetý jumystary «Azamattarǵa arnalǵan úkimet» MKK arqyly iske asyrylady. Sóıtip turǵyn úıdiń jer ýchaskesin belgileıtin aktisin memleket menshigine tapsyrýy qajet. Osy jumystar tolyǵymen aıaqtalǵannan keıin jańadan salynyp, berilgen úılerdiń qujattary tabystalady. Bul másele boıynsha aýyl turǵyndarymen birneshe ret kezdesý uıymdastyrylyp, túsindirildi. Jalpy turǵyn úıdi memlekettik esepten shyǵarý úshin jumsalatyn qarjy kólemi 30-40 myń teńge kóleminde. Bul qarjy memlekettik qyzmet kórsetýshi tarapqa tólenedi, — dep habarlady Yrǵyz aýdany ákimdigi.
Aqtóbe oblysy ákiminiń baspasóz qyzmetiniń habarlaýynsha, aýylǵa turǵyn úılerdi buzyp, materıaldaryn ózderi alýǵa ýaqyt berilgen. Sondyqtan da súrýge qarjy qarastyrylmady.
Eske salsaq, Aqtóbe qalasynda da byltyrǵy sý tasqyny kezinde buzylǵan, jaramsyz bolǵan úıler bıyl súrilýi tıis. Merdiger anyqtalǵanymen, olar bir-birine shaǵym túsirip, jumys uzaqqa sozylyp ketti.