Aqtóbede sý shaıyp ketken ótkelge kezekshilik qoıyldy

AQTÓBE. KAZINFORM — Oıyldaǵy sý shaıyp ketken ótkelde tótenshe jaǵdaılar qyzmetkerleri, jergilikti atqarýshy organ men áskerıler qalpyna keltirý jumysyn júrgizip jatyr.

Aqtóbe oblystyq TJD baspasóz qyzmetiniń habarlaýynsha, ótkel ústinen sý ótkeni týraly aqparat búgin saǵat 08:30–da túsken.

— Qazirgi kezde aýylǵa qaýip tónip turǵan joq. Azyq-túlik pen dári-dármek qory jetkilikti. Sý shaıǵan jerde TJD kúshterinen 10 adam, 3 tehnıka, jergilikti atqarýshy organnan 20 adam, 3 ekskavator, 3 júk tıegish, 8 júk tasıtyn kólik júr. Sonymen birge tótenshe jaǵdaılar qyzmetinen taǵy 14 adam 5 tehnıka jiberildi. Olarda jol talǵamaıtyn kólik bar. TJM Eset batyr Kókiuly atyndaǵy 20982 áskerı bóliminen de 20 adam men 3 tehnıka, bir motorly qaıyq jiberildi, — dep habarlady oblystyq TJD baspasóz qyzmeti.

Eske salsaq, Oıylǵa kireberistegi ýaqytsha ótkeldi sý shaıyp ketti. Saldarynan kólik qatynasy shekteldi. Adamdar eki araǵa jaıaý ótip júr. Olarǵa tótenshe jaǵdaılar qyzmetkerleri kómektesedi.

Byltyr kóktemde bul kópir qısaıyp, jóndeý jumysyna 4 mlrd teńge bólindi.