Aqtóbede sýrdlımpıada oıyndarynyń júldegerine páter beriledi
Óńir basshysy Ońdasyn Orazalın HHIV Sýrdlımpıada oıyndaryna qatysqan aqtóbelik sportshylarmen jáne olardyń jattyqtyrýshysy Janat Qojantaevpen kezdesti. Qazaqstan qurama komandasy qatarynda Muhtar Esenǵosuly, Beksultan Malaıdar, Erlan Súıeýálıev pen Rýslan Orynbasarov bar. Bul joly sportshylar Sýrdlımpıadaǵa alǵash ret qatysyp tur. Nátıjesinde erkin kúresten 92 keli salmaqta 24 jastaǵy Beksultan Malaıdar qola medal jeńip alsa, 97 keli salmaqtaǵy Muhtar Esenǵosuly tórtinshi oryndy ıelendi.
«Aqtóbelik sportshylar osyndaı mańyzdy jarystarda alda talaı jeńis ákeletinine senemin. Munyń júzege asýy úshin bizdiń oblysta Memleket basshysynyń tapsyrmasy boıynsha barlyq qajetti jaǵdaı jasalyp jatyr. Zamanaýı sport nysandary boı kóterýde. Sport sektsııalary ashylyp, onyń damýy úshin qarjy kózderi aýqymdy bólinip keledi. Eger ótken jyly oblysta 60 jańa nysan paıdalanýǵa berilse, bıyl toqsanǵa jýyq sport nysanyn qoldanysqa berýdi josparlap otyrmyz. Olardyń arasynda Aqtóbe qalasyndaǵy ústel tennısi ortalyǵy, Fýtbol akademııasy, aýdandardaǵy 5 dene shynyqtyrý-saýyqtyrý jáne 14 angarlyq tıptegi keshen bar. Taǵy bir atap óterlik jaıt, Múmkindigi shekteýli adamdarǵa arnalǵan sport ortalyqty paıdalanýǵa berýdi josparlap otyrmyz»,- dedi sportshylarmen tildesken oblys ákimi.
Ońdasyn Orazalın sportshylar men olardyń jattyqtyrýshylaryna ári qaraı kásibı jetistik pen zor densaýlyq tilep, baǵaly syılyq tartý etti. Budan bólek, qola júldeger Beksultan Bekaıdarǵa memlekettik qoldaý retinde páter beriledi.
«Men Qazaqstannyń namysyn qorǵaý úshin bar kúshimdi saldym. Jattyqtyrýshyma, múmkindigi shekteýli jandarǵa arnalǵan sport mektebiniń dırektory Gúlnar Qartanovaǵa alǵysymdy bildiremin. Ol óte talapshyl, biz odan kóp nárse úırendik»,- deıdi Beksultan Malaıdar.
Jattyqtyrýshy Janat Qojantaev sportshylardyń bir aı tynyǵyp, keıin respýblıkalyq jáne halyqaralyq jarystar baratynyn aıtty.
«Bizde jattyǵýǵa jaqsy jaǵdaı jasalǵan. Múmkindigi shekteýli jandarǵa arnap jańa sport kesheni ashylǵanda budan da keremet bolady. Budan da joǵary nátıjelerge umtylatyn bolamyz»,- dep ýáde berdi jattyqtyrýshy Janat Qojantaev.
