Aqtóbede sýıtsıd jasaǵan oqýshynyń ólimine qatysty is boıynsha tergeý júrip jatyr

AQTÓBE. KAZINFORM – Mártók aýdanynda 15 jastaǵy oqýshynyń óliminen soń tergeý júrip jatyr. Polıtsııa boljamdardy da teksermek. 

Qaılyǵy oqıǵa bıyl sáýir aıynyń sońynda boldy. Áleýmettik jelide taraǵan aqparatqa súıensek, boıjetken synyptasyna ǵashyq bolyp, ekeýiniń arasynda mamhabbat oty tutanǵan. Alaıda sengen synyptasy oǵan seksýaldyq zorlyq kórsetken. Muny oqýshy eshkimge aıtpaı, ishten tynyp, sońynda óz-ózine qol jumsaǵan.

Qazirgi kezde sýıtsıd boıynsha sotaldy tergeý júrip jatyr. Degenmen polıtsııa boljamdardy da teksermek. 

– Polıtsııa Qylmystyq kodekstiń «Ózin-ózi óltirýge deıin jetkizý, ózin-ózi óltirýge kóndirý nemese ózin-ózi óltirýge yqpal etý» baby boıynsha sot aldy tergeý jumystaryn júrgizip jatyr. Qazirgi kezde oqıǵanyń mán-jaıy tekserilip, kýágerlerden jaýap alynýda. Sonymen birge boljamdar da tekseriledi. Tergep-tekserý jumystarynan soń zań aıasynda protsesýaldyq sheshim qabyldanady, - dep habarlady Aqtóbe oblystyq PD baspasóz qyzmeti. 

Aqtóbe oblystyq bilim basqarmasy baspasóz qyzmetiniń habarlaýynsha, kóz jumǵan oqýshy qandaıda bir esepte turmaǵan.

– №3 Mártók orta mektebiniń 9-synyp oqýshysy óz-ózine qol jumsap, qaıtys boldy. Oqýshy dıspanserlik esepte turmaǵan. Bilim basqarmasy shuǵyl mobıldik top qurylyp, zerdeleý jáne psıhologııalyq qoldaý jumystaryn júrgizdi. Qazirgi tańda qylmystyq is qozǵalyp, tergeý amaldary júrgip jatyr, - dep habarlady Aqtóbe oblystyq bilim basqarmasy baspasóz qyzmeti.

Eske salsaq, sáýirde Aqtóbe oblystyq qylmystyq ister jónindegi mamandandyrylǵan aýdanaralyq sotynda eki sottalýshy ómir boıyna bas bostandyǵynan aıyryldy. Olar jasóspirimge seksýaldyq zorlyq kórsetip, anasyn bopsalaǵan.