Aqtóbede sýǵa ketken úılerde arnaıy komıssııa jumys istep jatyr
AQTÓBE. KAZINFORM – Aqtóbe qalasyndaǵy baý-baqsha ujymdarynda komıssııa jumys istep jatyr. Olar aldymen ótinishterdi qabyldaıdy.
Aqtóbe oblysy boıynsha 790-tan astam úıge sý kirdi. Onyń kóbi Oıyl men Qobda aýdandary bolǵanymen, Aqtóbe qalasynda da jer úılerge, onyń ishinde baý-baqsha ujymdaryndaǵy úılerge zaqym keldi. Qazir Almaty jáne Astana aýdandarynyń ákimdikteri, depýtattar men qoǵamdyq keńes músheleri, Іsker áıelder qaýymdastyǵynyń ókilderi ótinishti tirkep júr.
«Sýda qalǵan múlikti baǵalaý úshin komıssııa aldyn ala ótinish qabyldap jatyr. Qazir Aqtóbe qalasyndaǵy «Eko», «Zoovetsnab», «Kóktem», «Gaýhar», «Oazıs», «Gorprokýratýra», «Kirpishti» baý-baqsha ujymdarynan 225 ótinish qabyldandy. Bul saıajaı aýmaǵyndaǵy úıler sý tasqyny kezinde zaqymdanǵan. Biz kelip, úı ıesimen sóılesemiz, ony vıdeoǵa túsiremiz. Úıge sý kirgenin, múlkiniń búlingenin aıtyp, kórsetip beredi. Sony tirkep, jalpy sanyn jazyp alamyz», - Aqtóbe qalalyq Dáýren Taýasarov.
Onyń aıtýynsha, keıbiri turmystyq tehnıkasyn joǵary kóterip úlgerse, keıbiri múlde alyp shyǵa almaǵan. Qazir turǵyndar úıdegi sý dúnıelerin dalaǵa shyǵaryp tastady. Aldyn ala tirkeý komıssııasynyń jumysynan soń baǵalaýshylar jiberiledi.
«Men úıimdi 2009 jyly saldym. Óz eńbegimmen salǵan baspanam. Eń birinshi 2017 jyly sý kirdi. Ol kezde 1 metrge kóterilgen edi. Al bıyl 1 m 60 sm deıin kóterildi. Qazir irgetasynan bastap qabyrǵasyna deıin syr bergenin kórip turmyn. Bárin qaıta bekitip, jańartý kerek. Tek búlingen múlik qunyn qazirgi naryqqa saı etip baǵalap berse deımiz. Qurylys materıalyn, tehnıkany qazirgi qunymen eseptegeni durys. Sebebi biz ár zatty qaıta satyp alyp, buzylǵandy jóndeýge maman da shaqyrýymyz kerek», - dedi «Eko» baý-baqsha ujymynyń turǵyny Nurymjan Ábdihalyqov.
Onyń aıtýynsha, «Eko» baý-baqsha ujymy Elek jáne Qarǵaly ózenderi toǵysatyn Kirpishti turǵyn alabynda ornalasqan. Sondyqtan eki ózenniń qaı-qaısysy kóterilse de munda sý kirýi múmkin. Turǵyn begetti qazirgideı 1,5-2 metr emes, 3 metrge jetkizip, sazben nyǵyzdaýdy usyndy.
«Qazir turǵan bóget álsiz. Ózen túbindegi qumdy jaǵaǵa shyǵara salǵan. Aǵys qatty bolǵanda ony buzyp ketedi. Biz úı jóndeýmen qatar, bógetti nyǵaıtý jumysyn atqarsa deımiz. Ony normatıvke saı, qum, sazben bekitken durys», - dedi Nurymjan Ábdihalyqov.
